VIZIONI I KRYEMINISTRIT FRANCEZ FRONSUA BAIRU (FRANÇOIS BAYROU): NJË EVROPË MË E FORTË DHE MË E PAVARUR.

Paris, Francë | Presidenti i Partisë Demokratike Evropiane theksoi nevojën për një mbrojtje të përbashkët të Bashkimit Europian.

Në një intervistë kryesore në gazetën franceze “Le Figaro” javën e kaluar, presidenti i Partisë Demokratike Evropiane dhe kryeministri francez Fronsua Bairu (François Bayrou) dha një mesazh të fuqishëm mbi të ardhmen e mbrojtjes evropiane, qeverisjes ekonomike dhe autonomisë politike.

Vizioni i tij është i qartë: Evropa duhet të qëndrojë e fortë, e pavarur dhe strategjikisht e mbështetur te vetja në një botë me pasiguri gjeopolitike në rritje.

Ai theksoi nevojën urgjente për një organizatë evropiane të mbrojtjes, të pavarur nga Shtetet e Bashkuara.

“Një organizatë evropiane e mbrojtjes do të jetë zgjidhja e vetme e zbatueshme”, deklaroi ai, duke përforcuar idenë se Evropa nuk mund të varet më nga garancitë e sigurisë së ShBA-ës.

Rendi global në ndryshim, i shoqëruar nga konflikte të tilla si lufta në Ukrainë, e ka bërë të domosdoshme vetëbesimin evropian.

Ai vuri në dukje se edhe udhëheqësit gjermanë kanë filluar të diskutojnë mundësinë e mbështetjes në parandalimin bërthamor francez dhe britanik, një qëndrim i paimagjinueshëm deri vonë.

Për të forcuar më tej aftësitë e sigurisë së Evropës, ai mbrojti që shpenzimet ushtarake të përjashtoheshin nga rregullat e deficitit të Bashkimit Europian.

“Unë ndaj mendimin e atyre që thonë: në rrethana të tilla të rrezikshme, ne duhet të përjashtojmë shpenzimet ushtarake nga rregullat evropiane të deficitit”.

“Franca - argumentoi ai - tashmë ka investuar shumë në industrinë e saj të mbrojtjes, ndërsa vendet e tjera kanë mbetur prapa. Një përpjekje e koordinuar evropiane është tani thelbësore, duke siguruar që investimet e sigurisë të mos kufizohen nga kufizimet e ngurta financiare”.

Përtej fuqisë ushtarake, kryeministri Bairu (Bayrou) trajtoi gjithashtu joefikasitetin e mbirregullimit; ai beson se pengojnë rritjen ekonomike dhe qeverisjen.

I pyetur nëse ai përputhej me vizionin derregullues të z. Illn Mask (Elon Musk) apo Javier Milei, ai tha se: “As muskian dhe as argjentinas. Thjesht mendoj se jemi në një ngërç dhe kjo nuk mund të vazhdojë”.

Ai pranoi se ndërsa shteti luan një rol kritik në kohë krize, në rrethana normale, burokracia është kthyer në një barrë për bizneset dhe individët.

Kryeministri Bairu (Bayrou) theksoi se burokracia e tepërt administrative po mbyt inovacionin dhe konkurrencën evropiane.

Zgjidhja e tij? Zhvendosja e pushtetit të mbikëqyrjes nga institucionet burokratike tek qytetarët dhe bizneset që preken drejtpërdrejt nga rregullimi.

“Në vend që administrata t'i kontrollojë ata, ata do të kontrollojnë administratën”.

“Kjo qasje nga poshtë-lart - argumentoi ai - do të thjeshtonte procedurat, do të shkurtonte kufizimet e panevojshme dhe do të krijonte një mjedis ekonomik që nxit sipërmarrjen dhe efikasitetin në të gjithë kontinentin.

Ndërsa fokusi i tij kryesor për Evropën ishte mbrojtja dhe derregullimi, kryeministri Bairu (Bayrou) preku gjithashtu imigracionin dhe identitetin kombëtar - dy çështje të lidhura ngushtë me stabilitetin politik të Evropës.

Ai ripohoi kërkesën e Francës që Algjeria të respektojë marrëveshjet e dëbimit, duke paralajmëruar se mosrespektimi mund të rezultojë në revokimin e marrëveshjes së vitit 1968 që u jep algjerianëve status të veçantë në Francë.

Qasja e tij e fortë por diplomatike përputhet me politikat më të gjera të migracionit të Evropës, duke vendosur një precedent për zbatimin e marrëveshjeve duke ruajtur marrëdhëniet ndërkombëtare.

Sa i përket politikës së identitetit, ai propozoi nisjen e konventave të qytetarëve për të ripërcaktuar se çfarë do të thotë të jesh francez në botën e sotme të ndërlidhur.

Edhe pse i përshtatur si një debat kombëtar, ai pranoi dimensionin evropian të çështjes.

Ndërsa kombet e Bashkimit Evropian luftojnë me integrimin dhe nacionalizmin në rritje, nisma e Francës mund të frymëzojë një bisedë më të gjerë kontinentale për balancimin e trashëgimisë kulturore me një identitet të përbashkët evropian.

Fjalimi i tij nuk ishte vetëm për Francën.

Ai ishte një thirrje për Evropën që të rritet, të marrë kontrollin e së ardhmes së saj dhe të ndërtojë një kontinent të pavarur dhe elastik.

Nga reforma e mbrojtjes dhe ekonomike te migrimi dhe identiteti, mesazhi i tij ishte pragmatizmi dhe urgjenca.

Ndërsa Evropa lundron në një peizazh të paparashikueshëm global, udhëheqës si kryeministri Bairu (Bayrou), të cilët, mbrojnë pavarësinë strategjike dhe qeverisjen e përgjegjshme, do të formësojnë rrugën e saj përpara.

Vizioni i tij nuk është vetëm një axhendë kombëtare; është një plan për një Evropë që është më e fortë, më e bashkuar dhe e përgatitur për sfidat e ardhshme.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit