UKRAINA: MBI 20% E TOKËS SË PUNUESHME HUMBI PËR SHKAK TË LUFTËS; RRETH 2 MILIONË HEKTARË JANË POTENCIALISHT TË MINUARA.
- Agjencia Telegrafike Vox
- Mar 19
- 1 min read

Kiev, Ukrainë | Që nga fillimi i pushtimit rus në shkallë të plotë, Ukraina ka humbur 20.5% të tokës së saj bujqësore, duke rezultuar në një reduktim të prodhimit.
Kështu deklaroi Ministri i Politikës Bujqësore dhe Ushqimit, Vitali (Vitaliy) Koval, gjatë një transmetimi të drejtpërdrejtë televiziv.
“Lufta ka çuar në humbjen e më shumë se një të pestës së tokës bujqësore, duke reduktuar të korrat. Në vitin 2021, Ukraina prodhoi 106 milionë tonë drithëra dhe kultura industriale, ndërsa në vitin 2024, prodhimi ra në 77 milionë tonë”, shpjegoi z. Koval.
Sipas ministrit Koval, sipërfaqe të mëdha toke mbeten të papërdorshme për shkak të luftimeve, minave dhe pushtimit.
Për vitin 2025, qeveria ka ndarë një miliard hryvnia (rreth 22 milionë euro) për çminimin humanitar, i cili, do t'u shkojë drejtpërdrejt fermerëve.
Qëllimi është që deri në fund të vitit të rifitohen të paktën 65000 hektarë tokë bujqësore.
Aktualisht, rreth 2 milionë hektarë janë potencialisht të minuara, por 500 mijë hektarë tashmë janë ekzaminuar dhe korrigjuar.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments