U BOTUA LETRA APOSTOLIKE “UNITATE FIDEI” E PAPA LEO XIV-të DISA DITË PARA NISJES SË TIJ PËR UDHËTIM NË TURQI PËR TË PËRKUJTUAR 1700-VJETORIN E KËSHILLIT (KONCILIT) TË NIKESË.

Vatikan | “Në nivelin ekumenik, vërtet ajo që na bashkon është shumë më tepër sesa ajo që na ndan.

Kështu, në një botë të ndarë dhe të shqyer nga shumë konflikte, bashkësia e vetme universale e krishterë mund të jetë një shenjë paqeje dhe një instrument pajtimi, duke kontribuar në mënyrë vendimtare në një angazhim global për paqen”.

Kështu tha Papa Leo XIV-të në përfundim të Letrës Apostolike “Unitate Fidei”, e botuar disa ditë para nisjes së tij për udhëtim në Turqi për të përkujtuar 1700-vjetorin e Këshillit (Koncilit) të Nikesë.

“Koncili i Nikesë është në kohën e duhur për shkak të vlerës së tij të thellë ekumenike.

Arritja e unitetit të të gjithë të krishterëve ishte një nga qëllimet kryesore të Koncilit të fundit, Vatikanit II.

Pikërisht tridhjetë vjet më parë, Shën Gjon Pali II vazhdoi dhe promovoi mesazhin konciliar në Enciklikën ‘Ut unum sint’.

Kështu, me përvjetorin e madh të Koncilit të parë të Nikesë, ne festojmë edhe përvjetorin e enciklikës së parë ekumenike.

Mund të konsiderohet një manifest që përditësoi të njëjtat themele ekumenike të vendosura nga Koncili i Nikesë.

Lëvizja ekumenike ka arritur shumë rezultate në gjashtëdhjetë vitet e fundit.

Edhe nëse ende nuk na është dhënë uniteti i plotë i dukshëm me Kishat Ortodokse dhe Orientale Ortodokse dhe me bashkësitë kishtare të lindura nga Reformimi, dialogu ekumenik na ka çuar të njohim vëllezërit dhe motrat tona në Jezu Krishtin në vëllezërit dhe motrat e Kishave dhe bashkësive të tjera kishtare dhe të rizbulojmë bashkësinë e vetme dhe universale të dishepujve të Krishtit në të gjithë botën.

Në të vërtetë, ne ndajmë besimin në të vetmin Zot, rrëfejmë së bashku të vetmin Zot dhe Birin e vërtetë të Perëndisë, Jezu Krishtin, dhe të vetmin Shpirt të Shenjtë, i cili, na frymëzon dhe na shtyn drejt unitetit të plotë dhe dëshmisë së përbashkët të Ungjillit.

Për të qenë në gjendje ta kryejmë këtë shërbesë me besueshmëri, duhet të ecim së bashku për të arritur unitetin dhe pajtimin midis të gjithë të krishterëve.

Kredoja e Nikeas mund të jetë themeli dhe kriteri i referencës së këtij udhëtimi. Në të vërtetë, ajo na ofron një model të unitetit të vërtetë në diversitetin legjitim.

Prandaj, duhet t'i lëmë pas polemikat teologjike që kanë humbur arsyen e tyre të ekzistencës për të fituar një mendim të përbashkët dhe, akoma më shumë, një lutje të përbashkët drejtuar Shpirtit të Shenjtë, që ai të na mbledhë të gjithëve së bashku në një besim të vetëm dhe një dashuri të vetme.

Kjo nuk do të thotë një ekumenizëm që kthehet në gjendjen para ndarjeve, as një njohje të ndërsjellë të status quo-së aktuale të diversitetit të Kishave dhe bashkësive kishtare, por përkundrazi një ekumenizëm që shikon drejt së ardhmes, të pajtimit përmes dialogut, të shkëmbimit të dhuratave dhe trashëgimisë sonë shpirtërore.

Rivendosja e unitetit midis të krishterëve nuk na bën më të varfër; përkundrazi, na pasuron”, tha Papa Leo XIV-të.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit