TIRANË | MINISTRI PËR EVROPËN DHE PUNËT E JASHTME I REPUBLIKËS SË SHQIPËRISË FERIT HOXHA: PËRDORIMI I GJUHËS AMTARE NGA STUDENTËT NË MAQEDONINË E VERIUT ËSHTË E DREJTË THEMELORE.

Tiranë, Shqipëri | “E kam ndjekur me vëmendjen më të madhe shqetësimin e shprehur dhe kërkesën e drejtë dhe legjitime të studentëve shqiptarë në Maqedoninë e Veriut për dhënien e provimit në gjuhën shqipe.

Kjo është një çështje që kërkon trajtim të matur dhe të përgjegjshëm, larg çdo përpjekjeje për politizim.

Ajo duhet adresuar me seriozitet institucional dhe në frymën e respektimit të të drejtave themelore.

Studentët meritojnë përgëzim për angazhimin qytetar dhe mënyrën demokratike me të cilën kanë artikuluar kërkesën e tyre.

Kjo kërkon një përgjigje me të njëjtin standard përgjegjshmërie, përmes dialogut konstruktiv dhe zgjidhjeve që respektojnë plotësisht të drejtat e garantuara”, shkroi Ministri për Evropën dhe Punët e Jashtme, i Republikës së Shqipërisë, Ferit Hoxha, në një postim në rrjetin social virtual Iks (X), në lidhje me protestën e studentëve shqiptarë në Maqedoninë e Veriut, të cilët, kërkojnë të drejtën për të zhvilluar provimet në gjuhën shqipe.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit