SULM ME RAKETA NË BAZËN AJRORE TË KIRKUKUT NË IRAK | DYSHOHET SE SULMI ËSHTË VEPËR E GRUPEVE PARAUSHTARAKE PRO-IRANIANE QË VEPROJNË BRENDA IRAKUT.

Kirkuk, Irak | “Një sulm me raketa ndodhi të hënën në mbrëmje (30 qershor) në një bazë ushtarake në qytetin verior të Irakut, Kirkuk”, thanë dy burime sigurie për agjencinë e lajmeve Rojtërs (Reuters).

Sipas të njëjtave burime, të paktën dy raketa Katyusha u qëlluan në bazë, duke plagosur një person. Nuk janë raportuar vdekje apo dëme të konsiderueshme materiale.

Bazë irakiane me prani ndërkombëtare: Baza, e njohur si K-1 ose Kaywan, është nën komandën operative të ushtrisë irakiane.

Ajo përdoret gjithashtu herë pas here nga njësitë e koalicionit ndërkombëtar të formuar për të luftuar Shtetin Islamik, duke përfshirë forcat amerikane dhe evropiane.

Edhe pse Shtetet e Bashkuara tërhoqën shumicën e trupave të tyre nga baza në vitin 2020, si pjesë e një ridizajnimi të pranisë së tyre në Irak, raportet e muajve të fundit tregojnë një kthim të kufizuar të personelit ushtarak nga vendet anëtare të koalicionit për misione trajnimi dhe mbështetjeje.

Dyshime për grupe të armatosura paraushtarake: Asnjë grup nuk e ka marrë përgjegjësinë për sulmin deri më tani, por incidente të ngjashme në të kaluarën i janë atribuar grupeve paraushtarake pro-iraniane që veprojnë brenda Irakut dhe kundërshtojnë praninë e koalicionit ndërkombëtar, veçanërisht ShBA-ës.

Tensionet në rajon mbeten të larta, mes zhvillimeve më të gjera gjeopolitike në Lindjen e Mesme dhe paqëndrueshmërisë së vazhdueshme politike brenda Irakut.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit