SHTETET E BASHKUARA TË AMERIKËS U VIZITUAN NGA NJË KRYETAR PARLAMENTI GREK PËR HERË TË PARË PAS 18 VITESH.

Uashington, Amerikë | Kryetari i Parlamentit Grek, Nikitas Kaklamanis, u takua të premten me Kryepeshkopin Elpidoforos të Amerikës, në selinë e Kryepeshkopatës Ortodokse Greke në Jorkun e Ri, si pjesë e festimeve që shënojnë Ditën e Pavarësisë së Greqisë dhe paradën vjetore në Shëtitoren e Pestë (Fifth Avenue).

Vizita e Kryetarit Kaklamanis është e para e një kryetari të Parlamentit grek në Shtetet e Bashkuara të Amerikës në 18 vjet.

Zyrtarët thanë se takimi nënvizoi unitetin midis shtetit grek, kishës dhe komunitetit të mërgatës.

Gjatë bisedimeve të tyre, ai përcolli mirënjohjen e Parlamentit grek ndaj diasporës, duke e quajtur atë ambasadoren më të fortë dhe më të sinqertë të Greqisë jashtë vendit.

Ai gjithashtu i vuri theks të veçantë çështjes së Qipros, duke i kërkuar bashkësisë ndërkombëtare të tregojë të njëjtën ndjeshmëri ndaj pushtimit dhe ndarjes së vazhdueshme të Qipros, siç bën ndaj krizave të tjera bashkëkohore, përfshirë Ukrainën.

“Greqia dhe diaspora mbeten në anën e duhur të historisë, duke qëndruar për drejtësi dhe liri”, tha Kryetari Kaklamanis.

“Nuk është e drejtë që bota e civilizuar perëndimore, për 50 vjet, është sjellë sikur nuk e sheh dhe nuk e dëgjon që një ushtri pushtuese e mban të ndarë në dysh një vend të Bashkimit Evropian”, tha ai.

Ai vlerësoi rolin e mërgatës greke si një forcë e përkushtuar ndaj idealeve të demokracisë dhe lirisë, duke theksuar krenarinë e treguar nga brezat e rinj të greko-amerikanëve, të cilët, pavarësisht distancës dhe kohës, ruajnë lidhje të forta me trashëgiminë e tyre.

Më parë, ai vizitoi Shkollën Greko-Amerikane Saint Demetrios, në Astoria, e cila, ka 378 nxënës, ku vizitoi mjediset dhe bisedoi me nxënësit.

Ai mori pjesë gjithashtu në një shërbesë doksologjie në Kishën Ortodokse Greke të Shën Nikollës në Ground Zero, e ndjekur nga një ceremoni ngritjeje flamuri në Bowling Green në Manhatanin e Poshtëm (Lower Manhattan), ku morën pjesë anëtarë të diasporës dhe një njësi ceremoniale e Gardës Presidenciale.

“Vetëm pak ditë më parë mbusha 80 vjeç. Nuk e prisja që sot do të ishte momenti më emocional i 80 viteve të mia”, tha ai.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit