SHKUP | | AVOKATI I POPULLIT I REPUBLIKËS SË SHQIPËRISË ENDRIT SHABANI: GARANTIMI I GJUHËS SHQIPE ËSHTË E DREJTË KUSHTETUESE.

Shkup, Maqedonia e Veriut | Avokati i Popullit, i Republikës së Shqipërisë, Endrit Shabani, së bashku me homologun e tij të Republikës së Kosovës, Naim Qelaj, zhvilluan një takim zyrtar në Shkup, me Avokatin e Popullit të Republikës së Maqedonisë së Veriut, Faton Selami.

Ata diskutuan mbi protestat e studentëve shqiptarë dhe garantimin e përdorimit të gjuhës shqipe në arsimin e lartë.

Me statusin e Avokatit të Popullit dhe Presidentit të Organizatës së Avokatëve të Mesdheut (AOM), z. Shabani apeloi që kërkesat e studentëve të mos trajtohen si një problematikë rutinë administrative.

“Njohja e gjuhës është respektim i ekzistencës dhe i së drejtës për t’u përfaqësuar në hapësirë publike.

Procedurat administrative dhe vullnetet politike të momenteve nuk mund të mbivendosen mbi të drejtat e fituara dhe të ushtruara prej vitesh.

Garantimi i kësaj të drejte është test për stabilitetin rajonal dhe kusht themelor për integrimin europian të shoqërive tona”, tha Avokati i Popullit Shabani.

Avokati i Popullit i Republikës së Maqedonisë së Veriut, Faton Selami, njoftoi se institucioni që ai drejton ka nisur një hetim dhe e ka ngritur çështjen pranë instancave më të larta shtetërore.

Ai tha ishte optimist për një zgjidhje që do t’u mundësojë studentëve shqiptarë dhënien e provimeve në gjuhën amtare.

Në përfundim të takimit trepalësh, ata u angazhuan për bashkëpunim të ngushtë në mbrojtjen e të drejtave të njeriut në rajon, duke e vendosur këtë si pjesë të pandashme të vlerave europiane.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit