REPUBLIKA FEDERALE E GJERMANISË: EMRAT E ANËTARËVE TË PARTISË NACIONAL SOCIALISTE TASHMË GJENDEN NË INTERNET; PARTIA NAZISTE KISHTE MBI 10 MILIONË ANËTARË.

Berlin, Republika Federale e Gjermanisë | Për herë të parë, emrat e anëtarëve të Partisë Nacional Socialiste (NSDAP) në Gjermani midis viteve 1925 dhe 1945 mund të gjenden lehtësisht në internet duke përdorur një motor kërkimi.

Arkivi ishte ruajtur tashmë dhe ishte dixhitalizuar në mënyrë progresive në ShBA-ës nga Administrata Kombëtare e Arkivave dhe Regjistrimeve me miliona karta, por deri më tani ishte një dokumentacion i arritshëm vetëm në një mënyrë të kufizuar dhe i vështirë për t'u konsultuar në tërësinë e tij.

Që nga 2 prilli, e përjavshmja gjermane “Die Zeit” i ka bërë të dhënat të disponueshme në internet, duke e ripërpunuar materialin me mjete të inteligjencës artificiale dhe duke krijuar një motor kërkimi sipas emrit dhe vendit të lindjes.

Baza e të dhënave bazohet në kartën e anëtarësisë në Partinë Naziste, e cila, u përpilua sistematikisht gjatë Rajhut të Tretë.

Çdo kartë përmban informacione personale, duke përfshirë datën dhe vendin e lindjes, numrin e anëtarësisë dhe datën e anëtarësimit.

Historianët vlerësojnë se Partia Naziste kishte mbi 10 milionë anëtarë.

Dokumentacioni nuk është i plotë, por përfaqëson një nga burimet më të gjera të disponueshme mbi përbërjen e partisë.

Në fund të Luftës së Dytë Botërore, pjesa më e madhe e arkivit ishte në rrezik shkatërrimi, por një pjesë e konsiderueshme u ruajt dhe më vonë u përdor nga Aleatët në procesin e denazifikimit.

Ekspertët theksojnë se anëtarësimi në NSDAP nuk nënkupton automatikisht përgjegjësi penale dhe duhet të vlerësohet në kontekstin historik individual.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit