PRESIDENTI VOLODIMIR ZELENSKI: JAM DAKORD QË TË MBAHEN ZGJEDHJET NË UKRAINË BRENDA 60 OSE 90 DITËVE.

Kiev, Ukrainë | “Presidenti Volodimir Zelenski tha se nëse siguria e qendrave të votimit garantohet, edhe me ndihmën e aleatëve, zgjedhjet në vendin e tij mund të mbahen që brenda 60 deri në 90 ditëve të ardhshme”.

Disa media ndërkombëtare po shkruajnë për këtë qëndrim të tijin.

Presidenti Zelenski thuhet gjithashtu se i kërkoi parlamentit të përgatisë legjislacionin e nevojshëm për të lejuar mbajtjen e zgjedhjeve nën gjendjen e luftës.

Sipas Presidentit Zelenski, pretendimet se qeveria po mbahet fort pas pushtetit dhe kështu lufta nuk po mbaron janë plotësisht të pasakta.

Ai theksoi se zgjedhjet mund të mbahen vetëm nëse garantohet siguria e qytetarëve.

“Ka dy çështje në mbajtjen e zgjedhjeve: siguria, si ta bëjmë atë nën bombardime dhe raketa, dhe e dyta është baza legjislative për legjitimitetin e zgjedhjeve”, tha Presidenti Zelenski, sipas entit mediatik “RBC Ukrainë”.

Presidenti Zelenski deklaroi se u ka kërkuar Shteteve të Bashkuara dhe partnerëve evropianë të ndihmojnë në sigurimin e kushteve për mbajtjen e zgjedhjeve.

“Jam gati për zgjedhjet. Për më tepër, u kërkoj Shteteve të Bashkuara, ndoshta së bashku me kolegët tanë evropianë, të sigurojnë sigurinë për zgjedhjet. Nëse është kështu, Ukraina do të jetë gati për zgjedhje brenda 60-90 ditësh”, tha Presidenti Zelenski.

Presidenti Zelenski gjithashtu u bëri thirrje deputetëve të përgatisin propozime legjislative për të ndryshuar ligjin zgjedhor gjatë gjendjes së luftës dhe se pret që puna të përfundojë së shpejti.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit