PRESIDENTI VLADIMIR PUTIN: SHPENZIMET USHTARAKE RUSE JANË 6.3% TË PBB-së; SHPENZOJMË 172 MILIARDË $ NË VIT; DUAM T'I ZVOGËLOJMË; KEMI PAGUAR ME INFLACION PËR RRITJEN E TYRE.

Moskë, Federata Ruse | Presidenti rus Vladimir Putin tha se Moska shpenzon 13.5 trilionë rubla (rreth 172 miliardë dollarë), ose 6.3 përqind të PBB-së, për shpenzime ushtarake, dhe se planifikon t'i zvogëlojë këto shpenzime.

“A është shumë apo pak? Mendoj se është shumë, dhe sigurisht që është një nga problemet, përfshirë ato buxhetore, që duhet ta zgjidhim”, tha Presidenti Putin, sipas agjencive ruse të lajmeve, duke pretenduar se Rusia - trupat e së cilës pushtuan Ukrainën - kishte paguar me inflacion për rritjen e shpenzimeve ushtarake.

“Sa për ne, ne po planifikojmë të ulim shpenzimet tona të mbrojtjes”, tha Presidenti Putin, sipas agjencisë ruse të lajmeve “Interfax”.

Rusia pretendon se PBB-ja e saj u rrit me 4.3% në vitin 2024, por ekspertët thonë se kjo është nxitur artificialisht nga rritja e shpenzimeve ushtarake të lidhura me pushtimin e Ukrainës nga Kremlini.

Në tremujorin e parë të këtij viti, rritja ishte 1.4%; shifra më e ulët në dy vjet, sipas entit mediatik “France-Presse”.

Inflacioni në vitin 2024, sipas të dhënave zyrtare, arriti në 9.5% vitin e kaluar, shumë mbi objektivin prej 4% që qeveria ruse i ka vendosur vetes.

Banka qendrore ruse e ka rritur normën e skontimit në 21% vitet e fundit për të provuar të frenojë inflacionin, por në fillim të muajit e uli pak, në 20%.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit