PAPA LEO-XIV-të PATI TAKIM ME NJË SHOQATË TË AGJENCIVE KRYESORE BOTËRORE TË SHTYPIT KU DEKLAROI SE INFORMACIONI I LIRË ËSHTË NJË SHTYLLË QË DUHET TA MBROJMË.

Vatikan | “Informacioni i lirë është një shtyllë që mbështet ndërtimin e shoqërive tona, dhe për këtë arsye, ne jemi të thirrur ta mbrojmë dhe garantojmë atë”.

Papa Leo-XIV-të ia tha këtë Minds, një shoqatë e agjencive kryesore të shtypit në botë.

“Gazetarët e agjencive të shtypit janë të thirrur të jenë të parët në terren; shërbimi juaj është i paçmuar dhe duhet të jetë një antidot ndaj përhapjes së informacionit të pavlerë.

Me punën tuaj të duruar dhe rigoroze, ju mund të veproni si një pengesë për ata që, përmes artit të lashtë të gënjeshtrës, synojnë të krijojnë konflikte për të sunduar duke përçarë; një bastion i qytetërimit kundër rërës lëvizëse të përafrimit dhe post-së vërtetës.

Gazetaria nuk është krim dhe ne duhet t'i falënderojmë ata që janë në terren për të informuar, madje edhe me koston e jetës së tyre.

Çdo ditë, ka gazetarë që rrezikojnë jetën e tyre në mënyrë që njerëzit të dinë se çfarë po ndodh.

Dhe në një kohë si e jona, me konflikt të dhunshëm dhe të përhapur, ata që bien në terren janë viktima të luftës dhe ideologjisë së luftës, e cila, kërkon të parandalojë gazetarët të jenë të pranishëm.

Nuk duhet t'i harrojmë ata!

Nëse sot e dimë se çfarë ndodhi në Gazë, në Ukrainë dhe në çdo vend tjetër të përgjakur nga bombat, u detyrohemi kryesisht atyre.

Këto dëshmi ekstreme janë kulmi i mundit të përditshëm të kaq shumë njerëzve që punojnë për të siguruar që informacioni të mos kontaminohet nga axhenda të tjera, në kundërshtim me të vërtetën dhe dinjitetin njerëzor”, tha Papa Leo XIV-të.

Prandaj, Papa Leo XIV-të ripërtëriu apelin e tij për të liruar gazetarët e persekutuar dhe burgosur padrejtësisht për përpjekjen për të raportuar.

“E përsëris këtë kërkesë sot. Të jesh gazetar nuk mund të konsiderohet kurrë krim, por një e drejtë për t'u mbrojtur”, tha Papa Leo XIV-të.

Papa Leo XIV-të u bën thirrje gazetarëve, dhe veçanërisht agjencive të lajmeve, që ta çlirojnë komunikimin nga ndotja njohëse që e korrupton atë, nga konkurrenca e padrejtë, nga degradimi i të ashtuquajturit clickbait.

“Agjencitë e lajmeve janë në vijën e parë, të thirrura për të vepruar në mjedisin aktual të komunikimit sipas parimeve, për fat të keq jo gjithmonë të përbashkëta, që kombinojnë qëndrueshmërinë ekonomike të ndërmarrjes me mbrojtjen e të drejtës për informacion të saktë dhe të shumëfishtë”, tha Papa Leo XIV-të.

“Nuk jemi të destinuar të jetojmë në një botë ku e vërteta nuk dallohet më nga trillimi; duhet t'i bëjmë vetes disa pyetje të rëndësishme.

Algoritmet gjenerojnë përmbajtje dhe të dhëna në një shkallë dhe shpejtësi të paparë më parë.

Por kush i qeveris ato?

Inteligjenca artificiale po ndryshon mënyrën se si informohemi dhe komunikojmë, por kush po e udhëheq atë dhe për çfarë qëllimesh?

Duhet të jemi vigjilentë në mënyrë që teknologjia -të mos zëvendësojë njerëzimin, dhe që informacioni dhe algoritmet që e qeverisin atë sot të mos jenë në duart e disa njerëzve”, tha Papa Leo XIV-të.

“Ekonomia e komunikimit nuk mund dhe nuk duhet ta ndajë fatin e saj nga ndarja e së vërtetës.

Transparenca e burimeve dhe pronësia, llogaridhënia, cilësia dhe objektiviteti janë çelësat për të rivendosur rolin e qytetarëve si protagonistë të sistemit, duke i bindur ata të kërkojnë informacion të denjë për emrin”.

Së fundmi, ai u bëri thirrje agjencive të shtypit të mos e shesin kurrë autoritetin e tyre.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit