PAPA LEO XIV-të LËSHOI MESAZH PËR KRESHMËT: PËRMBAHUNI NGA FJALËT E ASHPRA DHE GJYKIMET E NXITUARA.

Vatikan | “Do të doja t'ju ftoja në një formë shumë praktike dhe shpesh të pavlerësuar të abstinencës; atë të përmbajtur nga fjalët që ofendojnë dhe lëndojnë të afërmin tonë”.

Papa Leo XIV-të e bëri këtë ftesë në zemër të mesazhit të tij për Kreshmët 2026, i cili, u botua të premten.

Ndërsa Kreshmët fillojnë të Mërkurën e Përhime, më 18 shkurt, Papa Leo XIV-të tha se kjo periudhë liturgjike u ofron të krishterëve një mundësi për ta vendosur misterin e Zotit përsëri në qendër të jetës sonë.

“Çdo udhëtim konvertimi, fillon duke e lënë fjalën e Zotit të prekë zemrat tona, në mënyrë që të ripërtërijmë angazhimin tonë për të ndjekur Krishtin në misterin e mundimit, vdekjes dhe ringjalljes së Tij shpëtuese”, tha ai.

Papa Leo XIV-të u përqendrua në rëndësinë e dëgjimit të Zotit dhe të atyre përreth nesh, duke i lejuar vetes të hyjmë në marrëdhënie autentike.

“Në mes të shumë zërave të pranishëm në jetën tonë personale dhe në shoqëri.

Shkrimi i Shenjtë na ndihmon të njohim dhe t'i përgjigjemi britmës së atyre që vuajnë dhe vuajnë.

Të krishterët, mund të kultivojnë një hapje të brendshme ndaj dëgjimit, ashtu siç bën Zoti, duke u rritur në vetëdijen se të varfrit sfidojnë jetën dhe sistemet tona ekonomike, si dhe Kishën”, tha Papa Leo XIV-të.

Papa Leo XIV-të më pas iu drejtua çështjes se si agjërimi na ndihmon të hapemi ndaj dëshirës së thellë për drejtësi, e cila, sipas tij, na çliron nga vetëkënaqësia.

“Pikërisht sepse përfshin trupin, agjërimi e bën më të lehtë të dallojmë se për çfarë kemi uri dhe çfarë e konsiderojmë të nevojshme për mbijetesën tonë.

Për më tepër, na ndihmon të identifikojmë dhe të rregullojmë orekset tona, duke e mbajtur gjallë urinë dhe etjen tonë për drejtësi.

Agjërimi, na mëson të qeverisim dëshirën tonë duke e pastruar, çliruar dhe zgjeruar atë, me qëllim që ta drejtojmë dëshirën tonë drejt Zotit dhe veprave të mira.

Megjithatë, duhet të agjërojmë me besim, përulësi dhe bashkim me Zotin, dhe jo në një mënyrë që të çon në krenari”, tha Papa Leo XIV-të - duke shtuar se edhe format e tjera të vetëmohimit çojnë në një stil jetese më të matur.

Papa Leo XIV-të më pas vuri në dukje një formë të nënvlerësuar të abstinencës, e cila, është përmbajtja nga fjalët lënduese.

“Le të fillojmë duke çarmatosur gjuhën tonë, duke shmangur fjalët e ashpra dhe gjykimet e nxituara, duke u përmbajtur nga shpifjet dhe të folurit keq për ata që nuk janë të pranishëm dhe nuk mund të mbrohen.

Në vend të kësaj, le të përpiqemi t'i masim fjalët tona dhe të kultivojmë mirësi dhe respekt në familjet tona, midis miqve tanë, në punë, në mediat sociale, në debatet politike, në media dhe në komunitetet e krishtera.

Nëse veprojmë kështu, do të lejojmë që fjalët e urrejtjes t’ua lënë vendin fjalëve të shpresës dhe paqes”, tha Papa Leo XIV-të.

Papa Leo XIV-të vazhdoi duke theksuar aspektin komunal të dëgjimit dhe agjërimit, të cilat, mund të jetohen në famullitë, familjet dhe bashkësitë tona fetare.

“Duke dëgjuar britmën e të varfërve dhe duke i vendosur zemrat tona në rrugën e kthimit drejt Krishtit, ne e stërvitim ndërgjegjen tonë dhe përmirësojmë cilësinë e jetës dhe të marrëdhënieve tona.

Do të thotë të lejojmë veten të sfidohemi nga realiteti dhe të njohim se çfarë na udhëheq vërtet dëshirat – si brenda bashkësive tona kishtare, ashtu edhe në lidhje me etjen e njerëzimit për drejtësi dhe pajtim”, tha Papa Leo XIV-të.

Papa Leo XIV-të e përfundoi Mesazhin e tij të Kreshmëve 2026 me një thirrje që komunitetet e krishtera të bëhen vende ku ata që vuajnë gjejnë mirëseardhje.

“Le të kërkojmë forcën që vjen nga lloji i agjërimit që shtrihet edhe në përdorimin tonë të gjuhës, në mënyrë që fjalët lënduese të pakësohen dhe t’i hapin rrugën një hapësire më të madhe për zërin e të tjerëve”, tha ai.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit