PAPA LEO XIV-të I DËRGOI LETËR URIMI PRESIDENTIT TË SHTETIT TË UKRAINËS ME RASTIN E 34-VJETORIT TË PAVARËSISË: I LUTEM ZOTIT QË ARMËT TË HESHTIN; ZEMRA IME ËSHTË E PLAGOSUR.

Vatikan | Tre vjet pas pushtimit rus të Ukrainës dhe në ditën që Ukraina feston 34-vjetorin e pavarësisë së saj kombëtare, Papa Leo XIV-të i shkruan Presidentit Volodimir Zelenski si më poshtë vijon:

1- “Me një zemër të plagosur nga dhuna që shkatërron tokën tuaj, ju drejtohem për t'ju siguruar lutjet e mia për popullin ukrainas që vuan për shkak të luftës”.

Papa Prevosti u drejtohet në veçanti të plagosurve; atyre që kanë humbur të dashurit e tyre; atyre që kanë mbetur pa strehë dhe i lutet Zotit të prekë zemrat e njerëzve vullnetmirë dhe të heshtë britmën e armëve; duke i hapur rrugën dialogut; duke hapur rrugën e paqes për të mirën e të gjithëve.

Letra u publikua nga Presidenti Zelenski ndërsa Papa Leo XIV-të po bëhej gati të afrohej te dritarja e Pallatit Apostolik për lutjen e Engjëllit (Angelus) në Sheshin e Shën Pjetrit.

Nga tribuna Papa Prevosti bëri gjithashtu një apel të ri për Ukrainën e munduar.

“Të premten e kaluar, më 22 gusht, ne shoqëruam vëllezërit dhe motrat tona që vuajnë për shkak të luftës me lutjet dhe agjërimin tonë.

Sot, ne bashkohemi me vëllezërit dhe motrat tona ukrainase të cilët, me një iniciativë lutjeje, i kërkojnë Zotit t'i japë paqe vendit të tyre të munduar”, tha Papa Leo XIV-të.

Këto fjalë përsëriten nga Rimini (ku po merr pjesë në Takimin e Kungimit dhe Çlirimit) edhe nga Kardinali Matteo Zuppi, i cili, u konfirmua nga Papa Leo XIV-të si ndërmjetës humanitar për dëmshpërblimin e fëmijëve ukrainas të rrëmbyer nga rusët dhe për shkëmbimin e të burgosurve.

“Ky fillim dialogu - vëren ai - duke iu referuar përpjekjeve diplomatike të nisura që nga samiti i gushtit midis Presidentëve Danlld Tramp (Donald Trump) dhe Vladimir Putin në Alaskë, mund të japë vërtet frytet që të gjithë dëshirojnë.

Natyrisht, është një udhëtim, është një rrugë, por për fat të mirë, megjithatë ka një rrugë.

Shpresojmë që të gjithë do të bëjnë pjesën e tyre dhe që të mund t'i japim fund shpejt konfliktit, në mënyrë që të gjithë të festojmë dhuratën e paqes së bashku.

Fjala që duhet t'ia kushtojmë popullit ukrainas - shton Kardinali Zuppi - është shpresa.

Ndonjëherë, përballë kaq shumë vuajtjeve, ne humbasim shpresën dhe në vend të kësaj duhet të shikojmë gjithmonë drejt shpresës, e cila, është pikërisht mënyra se si përballemi me të keqen.

Prandaj - përfundon ai - ne shpresojmë vërtet që ky fillim i dialogut të sjellë, me përgjegjësinë dhe kontributin e të gjithëve, frytet që të gjithë dëshirojmë vërtet”.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit