PAKTI I RI MBROJTJEJE MOSKË-MINSK | PUTINI: NGA VITI I ARDHSHËM NDOSHTA EDHE RAKETAT E REJA ORESHNIK.

Minsk, Bjellorusi | Rusia dhe Bjellorusia kanë nënshkruar një traktat të ri që parashikon garanci reciproke sigurie.

Këtë e tha zëdhënësi i Kremlinit, Dmitri Peskov, duke parashikuar objektivin e vizitës së presidentit rus Vladimir Putin në Minsk.

“Traktati i ri - sqaroi Putin menjëherë pas kësaj - parashikon përdorimin e të gjitha forcave të disponueshme, duke përfshirë armët bërthamore taktike ruse të vendosura në territorin bjellorus, në rast rreziku për sovranitetin, pavarësinë dhe rendin kushtetues të Rusisë dhe Bjellorusisë, integritetin dhe paprekshmërinë e territoreve” të dy vendeve.

Në këtë kontekst, shtoi ai, raketat e reja balistike hipersonike ruse Oreshnik mund të vendosen në Bjellorusi duke filluar nga gjysma e dytë e vitit 2025.

“Duke qenë se ne kemi nënshkruar një marrëveshje për garancitë e sigurisë me përdorimin e të gjitha forcave dhe mjeteve të disponueshme, mendoj se vendosja e sistemeve si Oreshnik në territorin e Bjellorusisë është e mundur”, tha presidenti rus Putin.

Sipas tij, kjo do të jetë e mundur në gjysmën e dytë të vitit të ardhshëm, kur prodhimi serik i raketës së re do të rritet dhe ky armatim do të hyjë në shërbim të forcave strategjike ruse.

“Në atë rast - tha presidenti bjellorus Aleksandër Lukashenko - objektivat do të caktohen nga udhëheqja ushtarako-politike e Bjellorusisë”.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit