NJË DELEGACION I HAMASIT PRITET TË UDHËTOJË PËR NË KAJRO | NDËRMJETËSUESIT PO PUNOJNË PËR NJË PROPOZIM TË RI PËR ARMËPUSHIM.

Kajro, Egjipt | Një delegacion i Hamasit do të udhëtojë për në Kajro për t'u takuar me ndërmjetësuesit egjiptianë, në një përpjekje të re për të arritur një armëpushim në Gazë.

Dy burime palestineze pranë çështjes e konfirmuan këtë.

“Një delegacion i lartë i Hamasit, i udhëhequr nga udhëheqësi Khalil al-Hayya, do të mbërrijë në Kajro sot ose nesër në mëngjes, me ftesë të Egjiptit, dhe do të zhvillojë një takim me zyrtarët egjiptianë”, tha një nga burimet për agjencinë e lajmeve “AFP”.

“Delegacioni do të diskutojë përpjekjet e Egjiptit dhe ndërmjetësve të tjerë për një armëpushim dhe lirimin e pengjeve izraelite në këmbim të të burgosurve palestinezë”, sipas burimit.

Burimi i dytë palestinez tregoi se ndërmjetësit po formulojnë një propozim të ri për një marrëveshje gjithëpërfshirëse armëpushimi.

“Ata po diskutojnë disa ide, njëra prej të cilave, është një armëpushim 60-ditor, i ndjekur nga negociatat për një armëpushim afatgjatë dhe një marrëveshje për lirimin e menjëhershëm të të gjithë pengjeve izraelite”, shtoi ai.

“Megjithatë - theksoi ai - deri më tani nuk mund të themi se ka diçka të re për të qenë optimist, veçanërisht pasi pushtimi izraelit po pengon çdo marrëveshje”.

Një zyrtar i Hamasit, i cili, kërkoi të mos identifikohej, i tha agjencisë së lajmeve “AFP” se lëvizja ende nuk ka marrë një propozim të ri për armëpushim.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit