MBRETËRIA E BASHKUAR | MIJËRA BRITANIKË DHE TURISTË BROHORITËN FAMILJEN MBRETËRORE BRITANIKE NË PARADËN E DITËLINDJES SË MBRETIT KARL (CHARLES) III.

Londër, Mbretëria e Bashkuar | Mijëra britanikë dhe turistë brohoritën familjen mbretërore britanike në paradën e ditëlindjes së Mbretit Karl (Charles) III në Londër.

Monarku dhe gruaja e tij, Mbretëresha Kamilë (Camilla), parakaluan në një karrocë përgjatë The Mall nga Pallati Bakingem deri në Paradën e Rojeve të Kuajve në spektaklin e njohur si “Trooping the Colour”, të shoqëruar nga qindra roje.

Princesha Keit (Kate) dhe fëmijët e saj, Xhorxhi (George), Karlota (Charlotte) dhe Luisi (Louis), parakaluan në një karrocë tjetër.

Princi Uilliam (William) shoqëroi paradën mbi kalë.

Midis turmës, mund të shiheshin edhe disa kundërshtarë të monarkisë, të cilët shprehnin mospajtimin e tyre me pankarta dhe slogane kundër Mbretit Karl (Charles) III.

Në fund, një procesion e solli familjen mbretërore përsëri në Pallatin Bakingem (Buckingham) dhe u qëllua një përshëndetje me 41 topa.

Një moment shumë i pritur i ceremonisë ishte mbikalimi i “Shigjetave të Kuqe”, ekipit akrobatik të Forcave Ajrore Britanike, i cili fluturoi mbi zonë, duke lënë gjurmë avulli të kuqe, të bardha dhe blu mbi Londrën qendrore.

Parada ajrore u ndoq nga familja mbretërore nga ballkoni, përpara se të luhej himni kombëtar.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit