KUBË | SHBA-ës PO FINANCOJNË PROJEKTE TË PAVARURA PËR LIRINË DHE DEMOKRACINË.

Havanë, Kubë | Ambasada e ShBA-ës në Kubë ka nisur një iniciativë për të mbështetur projekte të pavarura të dedikuara për promovimin e lirisë, prosperitetit ekonomik dhe aksesit në informacion.

Përmes programit të saj vjetor të diplomacisë publike “Drejt një Kube të Lirë dhe të Begatë”, ambasada fton qytetarët, organizatat e shoqërisë civile, institucionet e pavarura arsimore, gazetarët, krijuesit e përmbajtjes, artistët dhe sipërmarrësit të paraqesin propozime deri më 15 gusht.

“A ëndërroni një Kubë të lirë dhe të begatë? Çfarë idesh keni?”, thuhet në mesazhin e postuar në mediat sociale nga ambasada.

Iniciativa është pjesë e aktiviteteve që shënojnë 250-vjetorin e Shteteve të Bashkuara dhe synon të mbështesë projekte që lidhen me lirinë e shprehjes dhe shtypit, të drejtat e njeriut, drejtësinë individuale dhe zhvillimin e sipërmarrjes private.

Programi përfshin gjithashtu mbështetje specifike për mikro-bizneset e pavarura.

Ambasada ka sqaruar se individët ose organizatat e lidhura me ose që bashkëpunojnë me subjekte të lidhura me qeverinë kubane nuk janë të kualifikuar për të marrë pjesë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit