KORE E VERIUT: NË MEGA-RESORTIN E DIKTATORIT KIM KA PAK TURISTË; TË GJITHË RUSË; I SAPOHAPUR NË MUAJIN QERSHOR NJË JAVË PUSHIME KUSHTON 1700 €.

Phenian, Kore e Veriut | Koreja e Veriut hapi Zonën Turistike Bregdetare Wonsan Kalma.

Plazhe të shkreta dhe disa turistë, të gjithë rusë, në Resortin Wonsan-Kalma: kompleksi gjigant bregdetar në Korenë e Veriut, i përuruar në muajin qershor nga diktatori Kim Jong-un, për ta transformuar atë në një destinacion ndërkombëtar pushimesh.

Një raport i entit mediatik “SkyNews” mbledh dëshminë dhe videot e xhiruara në vendngjarje nga një menaxhere 33-vjeçare ruse, Anastasia Samsonova.

Videot tregojnë një plazh të gjatë me rërë me dhjetëra shezlongje, krejtësisht të zbrazët. E njëjta gjë vlen edhe për hollin e hotelit dhe dhomën e ngrënies, të cilat, janë të shkreta.

“Hoteli është absolutisht i ri”, thotë Anastasia.

“Gjithçka është shumë mirë e punuar, ambiente të brendshme të bukura, infrastrukturë shumë e përparuar. Ka shumë paragjykime për atë që mund dhe nuk mund të bësh në Korenë e Veriut, si duhet të sillesh. Por sinqerisht, ne ndiheshim absolutisht të lirë”, tha ajo.

Moska dhe Pheniani e forcuan aleancën e tyre gjatë luftës në Ukrainë.

Koreja e Veriut furnizoi fqinjin e saj me municione, pastaj dërgoi një forcë ekspedite për të zmbrapsur pushtimin ukrainas të Kurskut.

Rusia ka devijuar shumë nga prodhimet e saj, të cilat, nuk mund t'i shesë më Perëndimit, në shtetin e vetmuar.

Muajin e kaluar, u përurua një fluturim direkt midis Moskës dhe Phenianit.

Enti mediatik “SkyNews” intervistoi znj. Irina Kobeleva, një punonjëse e agjencisë së udhëtimit Vostopk Intur në kryeqytetin rus, e cila, ka filluar të shesë pushime në resortin e ri.

Një javë në Wonsan-Kalma kushton rreth 1700 €, duke përjashtuar fluturimet.

“Turistët tanë janë kryesisht të moshuar që duan të kthehen në kohën e ish-BRSS-së - shpjegon znj. Kobeleva - sepse ekziston një ndjesi se Koreja e Veriut është shumë e ngjashme me Bashkimin Sovjetik. Por në të njëjtën kohë, ka një kërkesë në rritje midis të rinjve. Kemi 400 rezervime në muaj”.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit