KATALONJA DËBOI 400 EMIGRANTË NGA NJË OBJEKT SHKOLLOR PUBLIK MES STIGMATIZIMIT TË VAZHDUESHËM DHE SHQETËSIMEVE PËR TË DREJTAT E NJERIUT.

Jorku i Ri, Amerikë | Ekspertët e OKB-së shprehën shqetësim për dëbimin e më shumë se 400 emigrantëve nga vendbanimi informal Badalona 9 (B9) në Katalonjë më 17 dhjetor, duke e quajtur këtë veprim një shkelje serioze të së drejtës për strehim të përshtatshëm dhe duke paralajmëruar se mund të përbëjë trajtim mizor, çnjerëzor ose degradues.

Vetëm rreth 30 banorë pritej të merrnin strehim emergjent, duke i lënë shumicën pa alternativa.

Shumë prej të prekurve janë gra, persona të moshuar dhe individë me nevoja mjekësore.

B9, një ish-shkollë e mesme, ishte bërë vendbanimi më i madh informal i emigrantëve në Katalonjë, duke strehuar midis 400 dhe 500 individë, kryesisht nga Afrika Sub-Sahariane.

Ndërsa Gjykata Administrative-Kontestuese Nr. 11 e Barcelonës autorizoi dëbimin, vendimi nuk u kërkonte autoriteteve të siguronin strehim të përshtatshëm për të gjithë banorët, duke shkaktuar kritika nga ekspertët e të drejtave të njeriut.

Dëbimi është shoqëruar me retorikë stigmatizuese nga zyrtarët publikë, duke i portretizuar emigrantët si një kërcënim për sigurinë.

Dëbimi ndodh mes tensioneve më të gjera rreth migracionit në Spanjë.

Në Torre Paçeko (Pacheco), në Spanjën juglindore, grupet e ekstremit të djathtë dhe banorët vendas u përleshën me emigrantët nga Afrika e Veriut në korrik 2025, duke rezultuar në arrestime dhe lëndime të shumta.

Ministri i Brendshëm Fernando Grande-Marlaska ia atribuoi dhunën retorikës anti-imigracion që qarkullonte në mediat sociale virtuale.

Në muajin korrik, zëvendëskryeministrja e Spanjës, Jolanda Diaz (Yolanda Díaz), bëri thirrje për legalizimin e 500 mijë emigrantëve, duke i kërkuar legjislaturës të miratojë legjislacionin që ofron status ligjor dhe leje pune.

Debati mbi migracionin në Spanjë ndërlikohet më tej nga narrativat kontradiktore ekonomike dhe sociale.

Punëtorët e huaj kanë kontribuar ndjeshëm në rritjen ekonomike të Spanjës, duke plotësuar role me paga të ulëta, por thelbësore, dhe duke ndihmuar në kompensimin e mungesës së fuqisë punëtore.

Politika e migracionit është përpjekur gjithashtu të mbrojë migrantët nga shfrytëzimi dhe t'i integrojë ata në fuqinë punëtore, duke përfshirë planet për t'u dhënë leje qëndrimi dhe pune 300 mijë migrantëve pa dokumente çdo vit gjatë tre viteve të ardhshme.

Në muajin shkurt të vitit 2017, rreth 160 mijë njerëz marshuan nëpër Barcelonë në mbështetje të refugjatëve, duke mbajtur pankarta ku shkruhej: “Ju mirëpresim”.

Demonstrata ndodhi në një kohë kur Spanja ishte zotuar të pranonte 17000 refugjatë, megjithatë deri atëherë kishte pranuar vetëm një pjesë të vogël të këtij numri.

Organizatorët e përshkruan marshimin si një shfaqje solidariteti dhe një thirrje për qeverinë që të përmbushë angazhimet e saj për të mbrojtur migrantët e cenueshëm.

Megjithatë, ndjenjat anti-emigrante vazhdojnë në disa zona.

Grupet politike të ekstremit të djathtë dhe aktorët lokalë janë lidhur me ngacmime, protesta dhe sulme ndaj migrantëve, përfshirë fëmijët, duke nxjerrë në pah përçarjet e vazhdueshme sociale.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit