JORDANIA DËBOI ME FORCË REFUGJATËT PALESTINEZË PËR PROJEKTE ZHVILLIMI URBAN.

Jorku i Ri, Amerikë | Organizata jo-qevritare Human Rights Watch (HRW) raportoi se autoritetet jordaneze dëbuan dhe shembën me forcë banesat në një kamp informal refugjatësh palestinezë në Aman pa ndjekur procedurat e duhura, si pjesë e një projekti zhvillimi urban.

Synimet e deklaruara të projektit përfshijnë përmirësimin e kushteve të jetesës, menaxhimin e rritjes urbane dhe mbulimin e kostove të përmirësimit dhe zgjerimit të objekteve të infrastrukturës përmes shitjes së tokës dhe tarifave të paguara nga banorët.

Projekti i zhvillimit zhvendosi dhjetëra banorë nga kampi al-Mahatta.

Qeveria dështoi të përmbushte standardet ligjore ndërkombëtare, duke përfshirë dhënien e njoftimit të duhur, konsultimit kuptimplotë dhe kompensimit të drejtë.

Tetë banorë të zhvendosur i thanë HRW-së se atyre iu dhanë vetëm dy javë deri në një muaj njoftim dhe premtime të paqarta, verbale për kompensim, me pak transparencë në lidhje me procesin ose afatin kohor.

Grupi argumentoi se këto dështime përbëjnë shkelje të të drejtave të njeriut të banorëve, duke përfshirë të drejtat për strehim, arsim dhe një standard të përshtatshëm jetese.

Z. Edm Kugll (Adam Coogle), zv/drejtor i Lindjes së Mesme në HRW, shtoi: “Zhvendosja e familjeve dhe ndërprerja e jetesës pa mbrojtje të duhura dhe një proces të drejtë kompensimi i lë dhjetëra njerëz me pak vende ku të drejtohen për ndihmë.

Autoritetet jordaneze duhet t'i japin përparësi të drejtave të banorëve kur shqyrtojnë projektet e infrastrukturës dhe të sigurohen që askush të mos mbetet pa strehim të përshtatshëm ose të drejta të tjera themelore”.

Sipas Këshillit të të Drejtave të Njeriut të OKB-së, mbrojtja e së drejtës për një standard të përshtatshëm jetese kërkon që shtetet të japin njoftimin e duhur për të gjithë personat potencialisht të prekur, shpërndarjen në kohë të informacionit përkatës, kohë të mjaftueshme për shqyrtim publik, qasje në ndihmë ligjore dhe teknike dhe mbajtjen e seancave dëgjimore publike.

Për më tepër, udhëzimet ndërkombëtare specifikojnë se shtetet duhet të ofrojnë kompensim të drejtë dhe të drejtë për të gjitha humbjet, duke përfshirë pronën personale dhe të paluajtshme, mallrat dhe interesat që lidhen me pronën.

HRW-ja theksoi se kompensimi i propozuar në këtë rast nuk i plotësonte këto standarde.

Kryetari i bashkisë Shawarbeh iu përgjigj shqetësimeve në lidhje me pamjaftueshmërinë e kompensimit duke pohuar se banorët po shkelnin tokën shtetërore dhe për këtë arsye nuk kishin të drejtë për kompensim.

Ai e karakterizoi ofertën e qeverisë si një donacion dhe jo si kompensim.

Së fundmi, e drejta ndërkombëtare ndalon dëbimet me forcë pavarësisht nga pronësia ligjore ose statusi i zotërimit.

Viktimave të dëbimeve me forcë duhet t'u ofrohet kompensim i përshtatshëm dhe qasje në mjete efektive juridike.

Në përgjigje të dëbimeve, z. Kugll (Coogle) i kërkoi Jordanisë të ofrojë mjete të shpejta dhe efektive juridike për banorët, veçanërisht ata në disavantazh ekonomik.

Vlen të përmendet se e drejta për strehim të përshtatshëm garantohet nga Neni 11.1 i Paktit Ndërkombëtar për të Drejtat Ekonomike, Sociale dhe Kulturore, në të cilin, Jordania është shtet palë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit