ITALIANI MERRET PENG NË GUAJAKUIL NGA POLICË TË RREMË.

Guajakuil, Ekuador | Dy keqbërës të armatosur, dhe të veshur si policë, me automatikë në dorë, dhe bashkëpunëtorët e tyre që i prisnin jashtë restorantit e morën peng.

Imazhet më të fundit të z. Panfilo Colonico, një kuzhinier me origjinë nga Abruco (Abruzzo), i cili ka qenë sipërmarrës në Ekuador, për më shumë se dy vjet, e tregojnë atë duke u marrë peng nga restoranti i tij.

Që atëherë (ishte e premte), nuk kemi dëgjuar më për të, thonë hetuesit të cilët po përpiqen të gjurmojnë rrëmbyesit. “Policia ekuadoriane – raporton gazeta ‘El Universo’ – ka aktivizuar njësitë e kërkimit”.

Kamerat e restorantit filmuan fazat e rrëmbimit. Pamjet tregojnë dy persona me fytyra të pambuluara, automatikë në duar, duke hyrë në klub të veshur me uniforma policie.

Një i tretë, gjithashtu i armatosur, mbetet jashtë i veshur me helmetë. Pak sekonda dhe kamerat filmojnë shefin italian të kuzhinës që përcillet nga restoranti nga një prej rrëmbyesve, pa bërë asnjë rezistencë.

Sipas mediave ekuadoriane z. Colonico, i njohur gjithashtu si “Benny”, kishte hapur restorantin “Il Sabore Mio” në lagjen Garzota, në qytetin industrial të Guajakuilit, në vitin 2020.

Gazeta “El Universo” raporton se rrëmbimi ka ndodhur mbrëmjen e djeshme. Nga ana e tij, portali i lajmeve “Primicias” pohon se emri i sipërmarrësit italian ka nisur të qarkullojë në lajme për ngjarje sentimentale me prezantues të ndryshëm të njohur nga bota e argëtimit.

Përpara Ekuadorit, z. Colonico kishte qenë në Kanada ku ngriti një biznes ndërtimi. Në mes të periudhës së bllokimit, kur e gjithë bota ishte e bllokuar dhe nuk lejohej të lëvizte nga një vend në tjetrin, vendosi të hapte një restorant italian në Guajakuil, kryeqyteti tregtar i Ekuadorit.

Copyright | Agjencia Telegrafike Vox