INTELIGJENCA AMERIKANE DENONCOI SE GRUPI UAGNER DO TË FURNIZOJË HEZBOLLAHUN ME SA-22.

Uashington, Amerikë | Inteligjenca amerikane beson se grupi paraushtarak rus Uagner (Wagner) po diskuton me Hezbollahun furnizimin e baterive të sistemit të mbrojtjes ajrore Sa-22, për lëvizjen shiite libaneze.

Këtë fakt e ka bërë të ditur sot gazeta Uoll Strit Xhërnëll (Wall Street Journal), duke cituar një burim të njohur me dosjen.

Gazeta nuk është në gjendje të konfirmojë nëse Sa-22 është dërguar tashmë në Lindjen e Mesme, por, i quan bisedimet në vazhdim midis Grupit Uagner (Wagner) dhe Hezbollahut një shqetësim të madh për Shtetet e Bashkuara.

Sistemi në fjalë bazohet në një përzierje raketash tokë-ajër dhe artilerie kundërajrore.

Në përpjekje për të dekurajuar Hezbollahun nga ndërhyrja në konfliktin e vazhdueshëm në Rripin e Gazës, Shtetet e Bashkuara kanë dërguar tashmë grupe sulmi nga dy aeroplanmbajtëse, USS Eisenhower dhe USS Ford, në Mesdheun lindor.

Grupi Uagner (Wagner) dhe njerëzit e Hezbollahut kanë qenë të pranishëm në Siri prej vitesh.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit