GREQI | BUJQIT DHE BLEGTORËT NË PROTESTË; PRITET MARRJA E VENDIMIT PËR PROTESTË MBARËKOMBËTARE.

Athinë, Greqi | Fermerët që protestojnë kundër vonesave në subvencionet e Bashkimit Evropian dhe ankesave të tjera, mbajtën bllokada rrugore në të gjithë Greqinë të premten, duke rreshtuar mijëra traktorë në autostradat kryesore ndërsa po shqyrtonin nëse do të përshkallëzonin veprimet e tyre.

Grupet e fermerëve thanë se nuk kishin marrë garanci konkrete nga qeveria konservatore se kërkesat e tyre do të përmbusheshin, pavarësisht kontakteve të vazhdueshme.

Në autostradën E65 në Greqinë qendrore, fermerët thanë se rreth 3000 traktorë ishin pozicionuar përgjatë rrugës, megjithëse trafiku nuk u ndërpre plotësisht.

Një ose dy korsi mbetën të hapura në autostradat kombëtare, duke lejuar që udhëtimi gjatë pushimeve të vazhdonte kryesisht pa pengesa.

“Ne nuk po bllokojmë trafikun”, thanë përfaqësuesit e fermerëve, duke shtuar se automjetet po kalonin normalisht gjatë periudhës së festave.

Fermerët i kaluan festat në postblloqe, duke ndezur zjarre dhe duke organizuar vakte të improvizuara Krishtlindjesh me familjet e tyre për të theksuar vendosmërinë e tyre.

Një takim kyç është planifikuar për të shtunën në mesditë në kryqëzimin e Nikaias pranë qytetit qendror të Larisës, të cilin, fermerët e përshkruan si një pararendës të një asambleje mbarëkombëtare që pritet të mbahet të dielën.

Takimi shihet si kritik për të vendosur nëse dhe si do të intensifikohen protestat.

Nikaia konsiderohet si një pikë referimi për lëvizjen bujqësore, duke pritur bllokadën më të madhe rrugore dhe duke tërhequr pjesëmarrjen më të madhe të protestuesve.

Qeveria ka thënë se nga 27 kërkesat e fermerëve, 16 janë trajtuar, katër janë në shqyrtim dhe shtatë nuk mund të përmbushen.

Megjithatë, fermerët këmbëngulin se kanë nevojë për përgjigje të qarta dhe dialog kuptimplotë.

Në stacionin e pagesës së Malgarës pranë Selanikut në Greqinë veriore, ku është planifikuar një takim tjetër, kabinat e pagesës mbetën të hapura dhe trafiku rrjedh pa probleme.

Trafiku i festave ishte më i pakët se zakonisht, pasi shumica e udhëtarëve ishin nisur më herët gjatë javës, ndërsa kthimet pritet të vazhdojnë pa ndërprerje.

Fermerët thanë se planet për ditët në vijim mbetën të paqarta.

Ndërsa disa kishin sugjeruar një kthim në bllokada më të dhunshme nga e hëna, udhëheqësit e protestës thanë se asnjë vendim nuk ishte përfundimtar dhe do të varej nga rezultati i takimit mbarëkombëtar deri të dielën.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit