GAZETA E PËRDITSHME TURKE “SABAH”: PAGERË SHPËRTHYES NË AEROPORT; INTELIGJENCA TURKE GJETI NGARKESË PREJ 1300 PAGERËSH; ISHTE GATI PËR T’U NISUR PËR NË LIBAN PASI MBËRRITI NË STAMBOLL NGA HONG KONGU.

Ankara, Turqi | Një dërgesë prej 1300 pagerësh dhe 710 karikuesish baterish që përmbanin eksplozivë u kap shtatorin e kaluar nga agjencia turke e inteligjencës MIT në aeroportin e Stambollit, disa ditë pas sulmit të Izraelit në Liban që shkaktoi shpërthimin e njëkohshëm të qindra pajisjeve të komunikimit pa tel të përdorura nga lëvizja shiite pro-iraniane Hezbollah.

Gazeta turke “Sabah” e raporton këtë, duke shpjeguar se ngarkesa e sekuestruar ishte gati për t’u nisur për në Liban pasi mbërriti në Stamboll nga Hong Kongu.

Sulmi izraelit në Liban, i marrë përsipër nga Mossadi në muajt në vijim, shkaktoi 51 vdekje dhe mbi 3000 të plagosur.

Sipas gazetës “Sabah”, MIT-i turk zbuloi pas shpërthimeve të njëkohshme se një dërgesë me pagerë kishte mbërritur në Stamboll një ditë para sulmit, gati për t’u nisur për në Bejrut.

Ngarkesa, me peshë 850 kilogramë, përbëhej nga 61 kuti.

Nisja e saj ishte planifikuar për 27 shtator 2024, nëpërmjet Aeroportit të Stambollit.

Brenda kutive, autoritetet gjetën 1300 pagerë të markës Gold Apollo dhe 710 karikues për tavolinë.

Zyra e prokurorit të Stambollit urdhëroi sekuestrimin e ngarkesës dhe dërgesa u transferua në një laborator për analiza të mëtejshme, me dyshimin për pajisje shpërthyese.

Hetimet zbuluan praninë e 3 gramëve të një lënde shpërthyese të bardhë të paidentifikuar brenda baterisë së secilit pager, së bashku me siguresat e detonatorit.

Analiza zbuloi se pajisjet mund të shpërthenin nga mbinxehja ose sinjalet në distancë, siç ndodhi në Liban.

Sekuestrimi i ngarkesës thuhet se u diskutua gjatë vizitës në Turqi dhjetorin e kaluar nga kryeministri i atëhershëm libanez Najib Miqati, i cili u prit nga presidenti turk Rexhep Tajip Erdogan.

Siç raportohet nga mediat turke, z. Miqati falënderoi presidentin Erdogan për operacionin e inteligjencës.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit