FRANCË | U NDALUA KONSUMI I ALKOOLIT NË VENDE PUBLIKE PËR SHKAK TË VALËS SË TË NXEHTIT.

Paris, Francë | Franca po merr masa emergjente për shkak të valës së zgjatur të të nxehtit që po përjeton prej një jave.

Një nga masat që do të fillojë sot, të premten, është ndalimi i alkoolit në vendet publike.

“Kjo është një masë që synon të kufizojë problemet shëndetësore të shkaktuara nga vala e të nxehtit.

Do të lëshoj një urdhër sonte, i cili do të parashikojë ndalimin e konsumit të alkoolit në vendet publike nesër, nga mesi i ditës e tutje. Siç e dini, pirja e alkoolit nën ndikimin e diellit mund të ketë pasoja katastrofike”, tha Prefekti i Policisë së Parisit (Préfet de Police de Paris) Patris For (Patrice Faure).

Ministrja e Shëndetësisë e Francës, Stefani (Stephanie) Rist, tha se rreziqet për të rinjtë dhe të moshuarit mund të jenë mjaft serioze për shkak të temperaturave ekstreme.

Goditja nga dielli nuk përbën një kërcënim të menjëhershëm për shëndetin, megjithatë, marramendja që shkakton mund të çojë në gjendje më serioze, siç është rënia ose mbytja për shkak të reagimit të dëmtuar.

Në këtë rast, një person duhet të zhvendoset menjëherë në një vend me hije dhe të vendosë një kompresë të ftohtë në kokë.

Goditja nga nxehtësia është forma më serioze e sëmundjes nga nxehtësia dhe ndodh kur trupi nuk mund ta rregullojë më temperaturën e tij.

Trupi nuk mund të heqë qafe nxehtësinë e akumuluar ose merr më shumë nxehtësi sesa mund të heqë qafe.

Simptomat përfshijnë temperaturë të lartë të trupit (mbi 40°C), humbje të vetëdijes, konfuzion, rrahje të shpejta të zemrës dhe ndoshta konvulsione.

Kjo gjendje kërkon ndërhyrje të menjëhershme mjekësore.

Zemra punon më shumë për të shtyrë gjakun në lëkurë për ftohje, gjë që mund të çojë në një rritje të rrahjeve të zemrës dhe presionit të gjakut.

Në raste ekstreme, kjo mund të shkaktojë probleme kardiovaskulare, veçanërisht tek individët vulnerabël.

Nxehtësia e tepërt mund të ndikojë në funksionin e trurit, duke shkaktuar konfuzion, gjykim të dëmtuar, nervozizëm dhe madje edhe humbje të vetëdijes.

Pirja e alkoolit gjatë një vale të nxehti përkeqëson shumë nga simptomat e mësipërme, kështu që është mirë ta shmangni atë.

Alkooli vepron si diuretik, që do të thotë se rrit prodhimin e urinës, duke çuar në humbje më të madhe të lëngjeve nga trupi.

I kombinuar me djersitjen e shtuar për shkak të nxehtësisë, kjo rrit rrezikun e dehidratimit, i cili mund të shkaktojë simptoma të tilla si marramendje, lodhje dhe konfuzion.

Pirja e alkoolit mund të pengojë aftësinë natyrore të trupit për të rregulluar temperaturën e tij.

Lodhja nga nxehtësia dhe goditja nga nxehtësia janë gjendje serioze që mund të shkaktohen nga mbinxehja e trupit dhe mund të jenë kërcënuese për jetën.

Pirja e alkoolit ndikon në gjykim dhe perceptim, duke rritur rrezikun e aksidenteve dhe lëndimeve.

Sidomos në plazh, kjo mund të përfshijë mbytjen, djegien nga dielli ose lëndime nga aksidentet në ujë.

Alkooli mund të rrisë ndjeshmërinë e lëkurës ndaj diellit, duke rritur rrezikun e djegies nga dielli dhe mund të shkaktojë skuqje dhe ënjtje të lëkurës.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit