ESTONI | MINSITRI I MBROJTJES HANNO PEVKUR: FORCAT E USHTRISË AMERIKANE DO TË VIJNË SË SHPEJTI.

Talin, Estoni | “Një njësi e re e Forcave të Armatosura të ShBA-ës pritet të mbërrijë në Estoni këtë verë dhe të qëndrojë në vend deri në fund të vitit, por situata pasuese mbetet e pasigurt”.

Kështu tha ministri estonez i Mbrojtjes Hanno Pevkur, i cituar nga enti mediatik publik “Err”.

Trupat amerikane kanë qenë të pranishme në Estoni në bazë rotacioni që nga viti 2022, sipas një marrëveshjeje dypalëshe, me kontingjente që aktualisht numërojnë midis 500 dhe 700 vetave.

Megjithatë, aktualisht, më pak se 100 ushtarë amerikanë mbeten në vend.

Ministri Pevkur tha se kishte marrë udhëzime nga Komandanti Suprem i Forcave Aleate të NATO-s për Evropën dhe Komanda e Ushtrisë Amerikane për Evropën që njësia tjetër duhet të vendoset në Estoni gjatë verës dhe të qëndrojë atje deri në fund të vitit 2026.

Megjithatë, madhësia e kontingjentit dhe perspektivat e tij për vitet në vijim mbeten të panjohura, pasi ato do të varen nga shqyrtimi dyvjeçar i Pentagonit.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit