TIRANË | U MBLODH KOMITETI I PËRBASHKËT SHQIPTARO-EGJIPTIAN PËR HERË TË PARË QË NGA VITI 1983.

Tiranë, Shqipëri | Ministrja egjiptiane e Planifikimit, Zhvillimit Ekonomik dhe Bashkëpunimit Ndërkombëtar, Rania Al-Mashat, mbërriti në Tiranë, për të kryesuar Komitetin e Përbashkët Egjiptiano-Shqiptar për Bashkëpunim Ekonomik, i cili, mbahet për herë të parë që nga viti 1993.

Ministrja Al-Mashat theksoi se Komiteti i Përbashkët Egjiptiano-Shqiptar synon të eksplorojë rrugët e bashkëpunimit midis dy vendeve dhe të forcojë marrëdhëniet dypalëshe, duke hapur perspektiva më të gjera partneriteti, veçanërisht në tregti, bashkëpunim ekonomik dhe investime të përbashkëta.

Ajo shtoi se seanca e Komitetit do të përfshijë gjithashtu një forum të përbashkët biznesi me pjesëmarrës të sektorit privat për të diskutuar mundësitë e investimit në fusha me interes të ndërsjellë.

Mbledhja e kësaj seance, sipas një deklarate nga ministria egjiptiane, pasqyron angazhimin e lidershipeve të të dy vendeve për të konsoliduar marrëdhëniet dypalëshe, veçanërisht pas vizitave zyrtare të nivelit të lartë, përfshirë atë të z. Ilir Meta, ish-President i Republikës së Shqipërisë në Egjipt, në muajin shkurt të vitit 2019, gjatë të cilës, u mbajtën takime zyrtare për të forcuar marrëdhëniet dypalëshe dhe për të diskutuar bashkëpunimin ekonomik dhe të investimeve.

Kryeministri aktual i Shqipërisë, Edi Rama, vizitoi gjithashtu Kajron për të njëjtin qëllim në muajin tetor të vitit 2021.

Gjatë dy ditëve të fundit, Ministrja Al-Mashat kryesoi takime përgatitore në nivel ekspertësh, me pjesëmarrjen e përfaqësuesve të të gjitha ministrive përkatëse, përfaqësuesve të Organizatës Arabe për Industrializim dhe përfaqësuesve të kompanive të mëdha në fushat e infrastrukturës, zhvillimit të pasurive të paluajtshme dhe turizmit.

Në këto takime përgatitore morën pjesë edhe përfaqësues të ministrive dhe institucioneve shqiptare, përfshirë homologen e saj shqiptare, Delina Ibrahimaj.

Ministria e Planifikimit egjiptian vazhdon të promovojë programin e Egjiptit për të forcuar marrëdhëniet ekonomike me partnerët shumëpalësh dhe dypalësh të zhvillimit.

Aktualisht ajo mbikëqyr 54 komitete të përbashkëta midis Egjiptit dhe vendeve të tjera, 30 prej të cilave janë në Evropë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit