EGJIPTI HAPI CENTRALIN E PARË BËRTHAMOR TË NDËRTUAR NGA RUSIA.

Kajro, Egjipt | Struktura e përmbajtjes për njësinë e parë të termocentralit bërthamor El Dabaa, i vendosur në bregdetin mesdhetar të Egjiptit veriperëndimor, u vendos, me pjesëmarrjen e Presidentit egjiptian Abdel Fattah al-Sisi dhe homologut të tij rus Vladimir Putin nëpërmjet videokonferencës.

Projekti i termocentralit bërthamor El Dabaa po zbatohet nga kompania shtetërore ruse Rosatom dhe përfshin ndërtimin e katër njësive me reaktorë VVER-1200.

Sipas marrëveshjeve, kompania do të furnizojë karburantin bërthamor dhe gjithashtu do të kujdeset për mirëmbajtjen e termocentralit, i cili, pritet të arrijë kapacitet të plotë deri në vitin 2030.

Marrëveshja programore për bashkëpunim gjithëpërfshirës midis qeverisë egjiptiane dhe Rosatom parashikon bashkëpunim në fusha të ndryshme, përfshirë mjekësinë.

Në ceremoninë e nënshkrimit morën pjesë kryeministri egjiptian Mustafa Madbuli (Madbouly), Ministri i Energjisë Elektrike dhe Energjisë së Rinovueshme Mahmoud Esmat, Kryetari i Bordit të Drejtorëve të Autoritetit të Termocentralit Bërthamor Sherif Hemli (Helmy) dhe Drejtori i Përgjithshëm i Rosatom Aleksei Likhaçev (Alexey Likhachev).

Presidenti al-Sisi e quajti ceremoninë e instalimit të strukturës së përmbajtjes për njësinë e parë fillimin e udhëtimit të Egjiptit në fushën e energjisë bërthamore.

Në fjalimin e tij në videokonferencë, presidenti egjiptian theksoi se ëndrra është bërë realitet falë marrëdhënies së ngushtë midis Egjiptit dhe Rusisë.

“Në emër të Allahut, të Gjithëmëshirshmit, Mëshirëplotit!

Shkëlqesia Juaj, Vladimir Putin, President i Federatës Ruse, zonja dhe zotërinj,

Para së gjithash, dua të shpreh mirënjohjen time të sinqertë ndaj Shkëlqesisë së Tij, Presidentit të Federatës Ruse, mikut tim të dashur Vladimir Putin, për pjesëmarrjen e tij të mirë në këtë ngjarje historike, instalimin e enës së reaktorit për njësinë e parë dhe për nënshkrimin e marrëveshjes për furnizimin me karburant bërthamor për zbatimin e vazhdueshëm të projektit tonë”, tha Presidenti al-Sisi në fjalën e tij.

Sipas Presidentit al-Sisi, bashkëpunimi midis dy vendeve është strategjik dhe vazhdon pavarësisht pengesave rajonale.

Presidenti al-Sisi theksoi se projekti i centralit El Dabaa pasqyron gjithashtu rëndësinë e trajnimit të specialistëve egjiptianë në fushën bërthamore dhe krijimin e mijëra mundësive të drejtpërdrejta dhe të tërthorta të punës.

“Egjipti po ecën vazhdimisht drejt ndërtimit të një të ardhmeje më të begatë përmes projekteve të rëndësishme strategjike”, përfundoi Presidenti al-Sisi.

Presidenti Putin, nga ana e tij, deklaroi se ndërtimi i centralit me pjesëmarrjen ruse është një projekt i suksesshëm që kontribuon në përmbushjen e nevojave energjetike të Egjiptit.

Presidenti rus theksoi gjithashtu se interesi i Egjiptit për zhvillimin e centralit është një simbol i miqësisë me Rusinë.

“Në të kaluarën, ekspertët sovjetikë morën pjesë në zhvillimin e ekonomisë egjiptiane në sektorët industrialë dhe të energjisë, siç janë Diga e Asuanit dhe fabrikat e Heluanit”, tha Presidenti Putin.

“Më shumë se 100 studentë egjiptianë kanë studiuar energjinë bërthamore në universitetet ruse”, deklaroi Presidenti rus, duke theksuar se Rosatom është gati të ndajë teknologjitë e tij unike për përdorimin paqësor të energjisë bërthamore me Egjiptin.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit