PRESIDENTI I KOLUMBISË GUSTAVO PETRO SHPALLI GJENDJEN E JASHTËZAKONSHME PËR SHKAK TË RRITJES SË DHUNËS ME FAT 90-DITOR | RAPORTOHEN SHKELJE TË DREJTAVE TË NJERIUT.

Bogota, Kolumbi | Presidenti kolumbian Gustavo Petro shpalli gjendjen e jashtëzakonshme - të premten në datën 25.01.2025 - në përgjigje të përshkallëzimit të dhunës midis Ushtrisë Çlirimtare Kombëtare (ELN) dhe fraksioneve disidente të Forcave të Armatosura Revolucionare të Kolumbisë (FARK).

Gjendja e jashtëzakonshme i jep presidentit Petro kompetenca të veçanta për 90 ditë dhe i lejon qeverisë të vendosë shtetrrethim dhe kufizime trafiku për të rivendosur rendin.

Presidenti Petro gjithashtu mund ta zgjasë atë periudhë dy herë, herën e dytë duke kërkuar miratimin e Kongresit.

Përleshjet e fundit kanë rezultuar në të paktën 80 viktima dhe zhvendosjen e rreth 36000 individëve.

ELN ka intensifikuar ofensivën e saj për të rimarrë kontrollin mbi Katatumbo, një rajon i pasur me kultivimin e kokës dhe burime natyrore.

Mes të vdekurve ka shumë ish-guerrilë të çmobilizuar të FARK-ut dhe të paktën një përfaqësues fermerësh.

Zyra e Ombudsmanit raporton shkelje të rënda të të drejtave të njeriut, duke përfshirë vrasjet e udhëheqësit të komunitetit, zhvendosjet e detyruara dhe rrëmbimet.

Morgjet në Kukuta (Cúcuta) dhe Okana (Ocaña) janë të mbingarkuar, duke tejkaluar kapacitetin për shkak të fluksit të trupave.

Në përgjigje të krizës, Ushtria Kolumbiane ka nisur “Operacionin Katatumbo”, duke vendosur trupa shtesë për të siguruar zonat kritike dhe për të mbrojtur civilët, veçanërisht në komunën e Tibu-së.

Gjenerali Luis Emilio Kardozo (Cardozo), komandanti i ushtrisë, shprehu optimizëm për rimarrjen e kontrollit brenda një deri në dy javë.

Presidenti Petro ka pezulluar bisedimet e paqes me ELN, duke përmendur mungesën e angazhimit të grupit për procesin e paqes.

Ai dënoi veprimet e ELN-së në Katatumbo si krime lufte, veçanërisht sulmet ndaj civilëve dhe ish-luftëtarëve.

Shpallja e gjendjes së jashtëzakonshme nga qeveria ka shkaktuar reagime të ndryshme.

Kritikët thonë se mund të shkelë Kushtetutën e Kolumbisë, ndërsa aktivistët shpresojnë se mund të çojë në përmirësimin e infrastrukturës dhe shërbimeve publike.

Konflikti ka pasur gjithashtu implikime ndërkufitare, me rreth 3000 individë të zhvendosur që kërkojnë strehim në Venezuelën fqinje.

OKB-ja ka denoncuar shkeljet e rënda të të drejtave të njeriut që ndodhin në zonë, duke theksuar nevojën urgjente për vëmendje dhe ndërhyrje ndërkombëtare.

Katatumbo ka qenë prej kohësh një zonë konflikti në Kolumbi, me grupe që luftojnë për kontrollin e prodhimit të saj të kokës dhe vendndodhjen strategjike.

Kriza aktuale nënvizon sfidat e vazhdueshme me të cilat përballet qeveria kolumbiane në përpjekjet e saj për të arritur paqen dhe stabilitetin e qëndrueshëm.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit