PRESIDENTI EMANUEL MAKRON: ASGJË NUK E JUSTIFIKON PËRSHKALLËZIMIN SERIOZ NË LIBANIN JUGOR.

Paris, Francë | “Asgjë nuk e justifikon përshkallëzimin serioz që po ndodh në Libanin jugor.

Franca do të vazhdojë të mbështesë autoritetet libaneze në përpjekjet e tyre për të rivendosur sovranitetin shtetëror dhe integritetin territorial të vendit”.

Kështu shkroi Presidenti Emanuel Makron në rrjetin social virtual Iks (X).

Presidenti Makron u drejtoi një mesazh Princit të Kurorës Saudite Mohammed bin Salman, Sulltanit Haitham bin Tarik të Omanit, Presidentit Mohammed bin Zaied të Emirateve të Bashkuara Arabe dhe Presidentit Abdel Fattah al-Sisi të Egjiptit.

“Është thelbësore të arrihet shpejt një marrëveshje midis Shteteve të Bashkuara dhe Iranit. Kjo mundësi duhet të shfrytëzohet tani.

Prioriteti duhet të jetë përfundimi i një armëpushimi dhe rihapja e menjëhershme e Ngushticës së Hormuzit, pa parakushte dhe në përputhje me ligjin ndërkombëtar.

Bisedimet duhet të vazhdojnë më pas për të arritur një marrëveshje gjithëpërfshirëse dhe të fortë për çështje të tjera, veçanërisht për programet bërthamore dhe të raketave balistike dhe për stabilitetin rajonal.

Franca është e gatshme të bëjë pjesën e saj, duke ndihmuar në rifillimin e trafikut detar me misionin e pavarur shumëkombësh të krijuar me Mbretërinë e Bashkuar, duke mbështetur bisedimet bërthamore me përvojën dhe aftësitë e saj dhe duke kontribuar në krijimin e nevojshëm të një kuadri rajonal të sigurisë, së bashku me partnerët, mbrojtjen e të cilëve ka ndihmuar të sigurohet në muajt e fundit.

Duhet të fillojmë me Libanin, ku është urgjente që të gjitha armët të heshtin, përgjithmonë” shkroi Presidenti Makron.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit