PAPA LEO XIV-të: BOTA NUK MUND TË SHPËTOHET DUKE MPREHUR SHPATAT.

Vatikan | Papa Leo XIV-të hyri në procesion në Bazilikën e Shën Pjetrit, ku këtë mëngjes kryesoi Meshën për Solemnitetin e Marisë më të Shenjtë, Nënës së Zotit, dhe me rastin e 59-të Ditës Botërore të Paqes, me temën: “Paqja qoftë me ju të gjithë”.

Pas kremtimit të Meshës, duke parë nga dritarja e Pallatit Apostolik Sheshin e Shën Pjetrit, Papa Leo XIV-të recitoi lutjen e Engjëllit (Angelus).

“Bota nuk shpëtohet duke mprehur shpatat, duke gjykuar, duke shtypur ose duke eliminuar vëllezërit dhe motrat tona, por duke u përpjekur pa u lodhur për të kuptuar, falur, çliruar dhe mirëpritur të gjithë, pa llogaritje ose frikë”, tha Papa Leo XIV-të gjatë meshës.

“Në fillim të vitit të ri, liturgjia na kujton se çdo ditë mund të jetë, për secilin prej nesh, fillimi i një jete të re, falë dashurisë bujare të Zotit, mëshirës së Tij dhe përgjigjes së lirisë sonë.

Dhe është bukur të mendosh për vitin që po fillon në këtë mënyrë; si një shteg të hapur, që pret të zbulohet, në të cilin, mund të aventurojmë, me anë të hirit, të lirë dhe bartës të lirisë, të falur dhe shpërndarës të faljes, duke besuar në afërsinë dhe mirësinë e Zotit që na shoqëron gjithmonë.

Pra, në fillim të vitit, ndërsa nisemi drejt ditëve të reja dhe unike që na presin, le t’i kërkojmë Zotit të ndiejë në çdo moment, përreth nesh dhe sipër nesh, ngrohtësinë e përqafimit të tij atëror dhe dritën e bekimit të tij, për të kuptuar gjithnjë e më mirë dhe për të kujtuar vazhdimisht se kush jemi dhe drejt çfarë fati të mrekullueshëm po përparojmë.

Në të njëjtën kohë, megjithatë, le t'i japim edhe ne lavdi, me lutje, me shenjtërinë e jetës sonë dhe duke pasqyruar mirësinë e tij ndaj njëri-tjetrit”, tha Papa Leo XIV-të.

“Në këtë Festë solemne, në fillim të vitit të ri, ndërsa i afrohemi përfundimit të Jubileut të Shpresës; le t’i qasemi skenës së Lindjes me besim si vendi i paqes të çarmatosur dhe çarmatosëse par excellence, një vend bekimi, në të cilin, të kujtojmë mrekullitë që Zoti ka kryer në historinë e shpëtimit dhe në ekzistencën tonë, dhe pastaj të nisemi përsëri, si dëshmitarët e përulur në shpellë, duke lavdëruar dhe lëvduar Perëndinë” (Lk 2:20) për gjithçka që kemi parë dhe dëgjuar. Le të jetë ky angazhimi ynë, vendimi ynë për muajt që vijnë dhe gjithmonë për jetën tonë të krishterë”, tha Papa Leo XIV-të.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit