NË PARAJSËN QË KA NDËRTUAR PARTIA KOMUNISTE E KUBËS 50% E POPULLSISË ËSHTË JASHTË TREGUT TË PUNËS; 560 MIJË PUNËMARRËS JANË PA SIGURIME SHOQËRORE.

Havanë, Kubë | Më shumë se gjysma e kubanezëve mbi moshën 15 vjeç nuk punojnë dhe as nuk kërkojnë punë.

Kjo është ajo që del nga Sondazhi i fundit Kombëtar i Punësimit i publikuar nga Instituti i Statistikave të Ishullit (ONEI), sipas të cilit, 50.1% e popullsisë në moshë pune është jashtë tregut të punës, duke përfshirë pensionistët, studentët, njerëzit e angazhuar në punë shtëpiake ose të paaftë për të punuar.

Në vitin 2024, nga mbi 8.4 milionë njerëz, më pak se 4.2 milionë janë ekonomikisht aktivë.

Në këtë kontekst, shkalla zyrtare e papunësisë, në 1.7%, duket se nuk përfaqëson mirë dinamikën e vërtetë të punësimit, siç e pranon vetë raporti.

Kështu, Kuba renditet ndër vendet me pjesëmarrjen më të ulët në fuqinë punëtore në Amerikën Latine dhe në Karaibe, shumë nën mesataren rajonale prej 58.9% të regjistruar nga Organizata Ndërkombëtare e Punës (ILO) në vitin 2023.

Gjithashtu shqetësuese është fuqia punëtore në plakje - 48.8% e të punësuarve janë midis 45 dhe 64 vjeç, dhe 25% janë mbi 60 vjeç - dhe përfshirja e dobët e të rinjve, të cilët përfaqësojnë pothuajse gjysmën e të papunëve (47.3%).

Ky fenomen përkeqësohet nga emigrimi në rritje i të rinjve në kërkim të mundësive më të mira.

Një faktor tjetër kritik është incidenca e lartë e punës informale, e cila, përfshin 20.1% të të punësuarve; mbi 831000 njerëz, shumica e të cilëve janë burra (77.2%) të punësuar në sektorin jo-shtetëror.

Përafërsisht 70% e këtyre janë të vetëpunësuar ose të punësuar nga punëdhënës privatë dhe familje, shpesh pa asnjë mbrojtje të sigurimeve shoqërore.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit