NDËRMJETËSIMI MES PALËVE NDËRLUFTUESE PO ZHVILLOHET PËR TË ARRITUR ARMËPUSHIM 45-DITOR.

Uashington, Amerikë | “Sipas katër burimeve amerikane, izraelite dhe rajonale të njohura me bisedimet, Shtetet e Bashkuara të Amerikës, Irani dhe një grup ndërmjetësuesish rajonalë po diskutojnë kushtet e një armëpushimi të mundshëm 45-ditor që mund të çojë në një përfundim përfundimtar të luftës”.

Kështu raportoi enti mediatik amerikan “Axios” - i përfolur si i lidhur me Inteligjencën amerikane.

Ndërmjetësit po diskutojnë me palët kushtet e një marrëveshjeje dyfazore:

1- Faza e parë do të përfshinte një armëpushim të mundshëm 45-ditor, gjatë të cilit do të negociohej një përfundim përfundimtar i luftës.

Armëpushimi mund të zgjatet nëse nevojitet më shumë kohë për bisedime, tha një nga burimet.

2- Faza e dytë do të përbëhej nga një marrëveshje për t'i dhënë fund luftës.

Burimet thonë se shanset për të arritur një marrëveshje të pjesshme në 48 orët e ardhshme janë të pakta.

Megjithatë, kjo përpjekje e fundit është shansi i vetëm për të shmangur një përshkallëzim dramatik të konfliktit.

Dy burime thanë se plani operativ për një fushatë masive bombardimi izraelito-amerikane kundër objekteve energjitike iraniane është gati, por theksuan se zgjatja e afatit të Presidentit Tramp (Trump) kishte për qëllim të ofronte një shans të fundit për të arritur një marrëveshje.

Negociatat thuhet se po zhvillohen përmes ndërmjetësve pakistanezë, egjiptianë dhe turq, si dhe përmes mesazheve me tekst midis të dërguarit të Presidentit Tramp (Trump), Stiv Uitkof (Steve Witkoff), dhe Ministrit të Jashtëm iranian, Abbas Aragçi (Araghchi).

Një zyrtar amerikan tha se administrata e Presidentit Tramp (Trump) i ka paraqitur Iranit disa propozime ditët e fundit, por zyrtarët iranianë deri më tani kanë refuzuar t'i pranojnë ato.

Burimet shtuan se ndërmjetësit besojnë se rihapja e plotë e Ngushticës së Hormuzit dhe një zgjidhje për uraniumin shumë të pasuruar të Iranit - qoftë përmes heqjes së tij nga vendi ose hollimit - mund të jetë rezultati i një marrëveshjeje përfundimtare.

“Ndërmjetësit po punojnë mbi masat e ndërtimit të besimit që Irani mund të ndërmarrë në lidhje me rihapjen e Ngushticës së Hormuzit dhe rezervave të tij të uraniumit”, thanë burimet.

“Këto dy çështje përfaqësojnë kartat kryesore të Iranit në negociata dhe iranianët nuk do të bien dakord t'i braktisin plotësisht ato vetëm për një armëpushim 45-ditor”, thanë dy nga burimet.

Ndërmjetësit duan të shohin nëse Irani mund të bëjë përparim të pjesshëm në të dyja çështjet në fazën e parë të marrëveshjes.

Ata gjithashtu po punojnë mbi masat që administrata e Presidentit Tramp (Trump) mund të marrë për t'i dhënë Iranit siguri se armëpushimi nuk do të jetë i përkohshëm dhe se lufta nuk do të rifillojë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit