KORE E VERIUT | MINISTRI RUS I MBROJTJES ANDREI BELUSOV (BELOUSOV) U TAKUA NË PHENIAN ME DIKTATORIN KIM JONG UN.

Moskë, Federata Ruse | “Ministri rus i Mbrojtjes, Andrei Belusov (Belousov), u takua sot në Phenian me udhëheqësin suprem të Koresë së Veriut, Kim Jong Un, për të diskutuar statusin dhe perspektivat e bashkëpunimit ushtarak midis Rusisë dhe Koresë së Veriut”.

Kështu raportoi agjencia ruse e lajmeve “Interfax”.

“Ministria e Mbrojtjes e Rusisë dhe Ministria e Mbrojtjes e Koresë së Veriut kanë rënë dakord të vendosin bashkëpunim ushtarak në një bazë afatgjatë.

Jemi gati të nënshkruajmë një plan për bashkëveprimin ushtarak ruso-koreano-verior për vitet 2027-2032 këtë vit”, tha Ministri Belusov (Belousov) gjatë takimit.

Ministri rus i Mbrojtjes tha se ishte shumë i nderuar që u takua me udhëheqësin e Koresë së Veriut, duke e falënderuar për pritjen e ngrohtë që i bëri delegacionit rus në Phenian.

“Marrëdhëniet ruso-koreano-veriore janë në një nivel të paparë.

Ky vit premton të jetë po aq intensiv sa i përket kontakteve dypalëshe në një gamë të gjerë frontesh”, tha ai.

Ministria ruse e Mbrojtjes shprehu gjithashtu vlerësim të madh për vendimin e Kim-it për të ftuar delegacionin ushtarak rus në ceremoninë e hapjes së Muzeut dhe Memorialit për ushtarakët koreanë gjatë operacioneve ushtarake jashtë vendit.

“Është një privilegj dhe nder i madh për ne të marrim pjesë në këtë ngjarje historike”, tha Ministri Belusov (Belousov).

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit