JETËGJATËSIA: DIETA E QËNDRUESHME UL RREZIKUN E VDEKJES ME 25%.

Boston, Amerikë | Hulumtimi i ri arrin në përfundimin se një dietë e qëndrueshme jo vetëm që mbron mjedisin, por edhe shëndetin, duke reduktuar rrezikun e vdekjes së parakohshme.

Miratimi i një diete miqësore me planetin nuk është vetëm e mirë për planetin, por mund t'ju ndihmojë të jetoni një jetë më të shëndetshme dhe më të gjatë, sipas një studimi të ri.

Një grup shkencëtarësh zbuluan se njerëzit që ndjekin një dietë të qëndrueshme për mjedisin përballen me një rrezik të reduktuar prej 25% të vdekjes. Gjetjet e reja u prezantuan në takimin vjetor të Shoqatës Amerikane për Ushqyerjen NUTRITION 2023 në Boston.

Studimi u bazua në hulumtimet e mëparshme, të cilat arritën në përfundimin se ushqimet që mbrojnë mjedisin janë të dobishme për shëndetin (drithërat, frutat, perimet pa niseshte, arrat, vajrat e pangopur dhe të tjera), por edhe anasjelltas, d.m.th. ushqimet që janë të dëmshme për mjedisin ndikojnë negativisht në organizëm (vezët, mishi i kuq dhe i përpunuar e të tjera).

Për të krijuar Indeksin e Dietës së Shëndetit Planetar (PHDI), studiuesit shqyrtuan provat e disponueshme mbi marrëdhëniet midis grupeve të ndryshme ushqimore dhe kushteve shëndetësore.

Më pas ata aplikuan indeksin për të analizuar rezultatet në më shumë se 100000 pjesëmarrës të dy studimeve të mëdha të kryera në SHBA.

Grupi i të dhënave përfshinte më shumë se 47000 vdekje gjatë një periudhe pasuese prej më shumë se 30 vjetësh (1986-2018).

Përfundimi i arritur ishte se njerëzit me dietën më miqësore me mjedisin përballeshin me një rrezik 25% më të ulët të vdekjes nga çdo shkak.

Në mënyrë të veçantë, rezultatet më të larta PHDI u shoqëruan me një rrezik 15% më të ulët të vdekjes nga kanceri, ose sëmundjet kardiovaskulare, një rrezik 20% më të ulët të vdekjes nga sëmundjet neurodegjenerative, dhe një rrezik 50% më të ulët të vdekjes nga sëmundjet e frymëmarrjes. Nga z. Erton Duka

© Copyright | Agjencia Telegrafike Vox