ITALIA DHE TURQIA PËRFORCOJNË MARRËDHËNIET STRATEGJIKE.

Romë, Itali | Disa ditë pasi “Chevron” dhe “HelleniQ Energy” shprehën interes për eksplorimin në jug të Kretës dhe mes tensioneve mbi lidhjet e energjisë Greqi-Qipro, Ministri i Jashtëm turk Hakan Fidan theksoi respektin për të drejtat sovrane të Ankarasë dhe të drejtën ndërkombëtare në të gjitha aktivitetet mesdhetare.

Duke folur së bashku me Ministrin e Jashtëm italian Antonio Tajani në Romë, Ministri Fidan tha se Mesdheu është çelës për sigurinë dhe lidhshmërinë energjetike të Evropës, duke bërë thirrje për koordinim në juridiksionet detare.

Ai vlerësoi ndjeshmërinë e Italisë ndaj shqetësimeve turke dhe theksoi lidhjet në rritje të mbrojtjes, duke përmendur blerjen e “Piaggio Aerospace” nga “Baykar”, bashkëpunimin me “Leonardo” dhe progresin në prokurimin e “Eurofighter”.

Italia kërkon një partneritet strategjik me Turqinë, me perspektiva për bashkëprodhim të sistemeve pa pilot.

Analistët vunë në dukje se qëndrimi i Romës injoron kundërshtimet e Athinës dhe sinjalizon një bashkëpunim më të ngushtë turko-italian në Libi.

Ministri Fidan reagoi gjithashtu ndaj komenteve të kryeministrit grek Qirjakos Micotaqis (Kyriakos Mitsotakis) mbi kreditë e mbrojtjes të BE-së dhe thirrjet për të hequr “casus belli”-n e Turqisë, duke thënë se deklarata të tilla janë të panevojshme duke pasur parasysh stabilitetin aktual në Egje.

Ministri Tajani e quajti Turqinë një partner të rëndësishëm strategjik.

Ankaraja shpreson për një momentum pas një takimi të planifikuar midis Kryeministrit Micotaqis (Mitsotakis) dhe Presidentit turk Rexhep Tajip Erdogan dhe Këshillit të Bashkëpunimit të Nivelit të Lartë Turqi-Greqi, i cili u vonua prej kohësh.

Ndërkohë, zyrtarët turq shprehën kënaqësi për situatën e vazhdueshme midis Nikozisë dhe Athinës në lidhje me lidhjen e energjisë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit