IRAN | ISH-PRESIDENTI MAHMUD AHMADINEXHAD (MAHMOUD AHMADINEJAD) U VENDOS NË MASË SIGURIMI “ARREST NË SHTËPI”; AKUZOHET SI SPIUN I IZRAELIT.

Teheran, Iran | “Ish-presidenti Mahmud Ahmadinexhad (Mahmoud Ahmadinejad) është nën arrest shtëpiak nga krahu i inteligjencës i Gardës Revolucionare Islamike, pasi autoritetet iraniane zbuluan një pjesë të konsiderueshme të kontakteve të tij me Izraelin”.

Kështu raportoi enti mediatik amerikan “New York Times”, duke cituar katër zyrtarë të lartë iranianë.

Për vite me radhë, Izraeli kreu një operacion të fshehtë që synonte rekrutimin e tij si një aset të inteligjencës dhe në një fazë të mëvonshme, madje planifikoi ta instalonte atë si udhëheqës të Iranit pas përmbysjes së regjimit të ajatollahëve.

Sipas raportit, një nga fazat më të pazakonta të operacionit ndodhi në fillim të vitit 2024, kur një zyrtar i lartë i qeverisë hungareze i kërkoi rektorit të Universitetit të Shërbimit Publik Ludovika në Budapest, Gergeli (Gergely) Deli, të ftonte ish-presidentin Ahmadinexhad në një konferencë mbi ndryshimet klimatike.

Rektori Deli tha se i ishte thënë se konferenca në fakt do të shërbente si mbulesë për bisedime sekrete midis ish-presidentit Ahmadinexhad dhe zyrtarëve të inteligjencës izraelite.

Pavarësisht shqetësimeve për dëmtimin e mundshëm të reputacionit të tij dhe atij të universitetit, ai pranoi ta ftonte sepse besonte se nëse ke dy armiq dhe nëse këta armiq duan të flasin me njëri-tjetrin, atëherë është më mirë të bësh çmos që ata të flasin.

Ish-zyrtarë amerikanë thanë se ish-kreu i Mossad-it, David Barnea, udhëtoi personalisht për në Budapest për t'u takuar me ish-presidentin Ahmadinexhad.

Në vitet që pasuan, Izraeli bëri disa pagesa sekrete për Ali Akbar Javanfekr, një zëdhënës i ish-presidentit Ahmadinexhad, dhe agjentët izraelitë u takuan me të disa herë të tjera para fillimit të Operacionit “Luani që Rënkon”.

Në muajin shkurt, shtëpia e ish-presidentit Ahmadinexhad u godit nga një sulm ajror izraelit që synonte truprojat dhe makinën e tij të blinduar, pas së cilës ai u kap nga operativët e Mossad-it dhe u dërgua në një shtëpi të sigurt sekrete.

Ai përfundimisht u largua nga shtëpia e sigurt për arsye të paqarta dhe nuk u pa më derisa u shfaq në funeralin e ish-udhëheqësit suprem Ali Khamenei.

Sipas zyrtarëve të lartë iranianë, ai është marrë në paraburgim nga krahu i inteligjencës i Gardës Revolucionare Islamike dhe është vendosur në arrest shtëpiak.

Sipas z. Abdolreza Davari, një ish-këshilltar dhe bashkëpunëtor i ish-presidentit Ahmadinexhad, ai nuk do të kishte punuar me Izraelin për para.

“Ai ka para; ka një rrjet të gjerë ekonomik. Do ta bënte për pushtet. Ai dëshiron të jetë në krye të pushtetit”, tha z. Davari për  entin mediatik “New York Times” në një intervistë telefonike.

Një bashkëpunëtor tjetër tha se ish-presidenti Ahmadinexhad kishte folur për ambiciet e tij për t'u bërë sundimtari i ri i Iranit me ndihmën e fuqive të huaja dhe kishte qenë i shqetësuar se një luftë do t'i bënte ShBA-ës dhe Izraelin të zgjidhnin një figurë destabilizuese në vend të saj.

Pasi u skualifikua tre herë në garën presidenciale të Iranit, ish-presidenti Ahmadinexhad ishte bërë mosbesues ndaj sistemit iranian.

Ai kishte shprehur gjithashtu zhgënjim dhe pakënaqësi ndaj anëtarëve të regjimit iranian.

Ai kishte deklaruar në të kaluarën se, nëse kthehej në pushtet, do të normalizonte marrëdhëniet me Izraelin përmes “Marrëveshjeve të Abrahamit”.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit