EVROPA ËSHTË NË DUART E MAFIES SË DROGËS | BANDAT KRIMINALE PO NDËRTOJNË PARASHTETE ME ARMË + KORRUPSION + TERROR.

Nga z. Dhimitër Driza (Dimitris Drizos).

Bruksel, Mbretëria e Belgjikës | Mafia e drogës po shtrëngon kontrollin e saj në të gjithë Evropën, duke terrorizuar komunitetet, duke kërcënuar zyrtarët publikë dhe duke e shndërruar Belgjikën në një portë kryesore të hashashit në kontinent.

Një kryetar bashkie në Francën jugore u nxor me nxitim nga shtëpia e tij gjatë natës dhe u vu nën mbrojtjen e policisë pasi autoritetet u njoftuan për një sulm të mundshëm kundër tij nga banda më e fuqishme e drogës në vend, Mafia DZ.

Ministri i Brendshëm Loran Nunjes (Laurent Nunez) tha se vendosi të shkarkojë kryetarin e bashkisë së qytetit të Ales-it, Kristof Rivenk (Christophe Rivenck), pasi informacione të besueshme nga shërbimet e sigurisë treguan se një sulm kundër tij ishte i afërt.

Mafia DZ, e cila e ka origjinën në Marsejë, rreth 160 kilometra në jug të Ales, ka evoluar nga një bandë lokale në një nga kërcënimet më të mëdha të sigurisë në Francë, për shkak të dominimit të saj në tregtinë e drogës.

“Ai kishte marrë kërcënime më herët gjatë muajit, kur plumba 9 mm iu gjetën në kutinë e tij postare, së bashku me grafite kërcënuese në muret e shtëpisë së tij”, e thënë kjo sipas Zyrës së Prokurorit Kombëtar të Francës për Luftën kundër Krimit të Organizuar (PNACO).

“Nuk kam marrë kurrë kërcënime të këtij niveli. Kjo tregon se veprimet që po ndërmarrim kundër DZ dhe trafikimit të drogës po japin rezultate. Nuk do të frikësohem”, tha ai.

Të enjten, në Marsejë, ylli i reality show-t dhe influencuesja Karla Moro (Carla Moreau), me moshë 29 vjeçe, mori gjithashtu një letër kërcënuese nga banda në shtëpinë e saj, pasi makina e saj u dogj gjatë natës.

Prokurorët thanë se kishin nisur një hetim për zhvatje të mundshme, pasi mesazhi, i cili ishte dërguar me një telefon celular, përmbante kërcënime me vdekje.

“Tregu i drogës së paligjshme në Francë pothuajse u trefishua në vlerë midis viteve 2010 dhe 2023, duke u rritur nga rreth 2.3 miliardë € në 6.8 miliardë €”, - e thënë kjo sipas një raporti të botuar në muajin dhjetor të vitit 2025 nga Observatori Francez për Drogën dhe Varësinë (OFDT).

Vitin e kaluar, ministri i Drejtësisë Zherald Darmanë (Gérald Darmanin), tha se Franca po vuante nga një kancer i tregtisë së drogës, duke pretenduar se nuk kishte më vende të sigurta.

Ai tha në një intervistë se edhe qyteti më i vogël rural në Francë tani është i njohur me kokainën dhe hashashin.

“Drogat, për shembull, kanë ekzistuar gjithmonë, por sot e shohim qartë se edhe në qytetin më të vogël rural ata dinë për kokainën dhe kanabisin”, - tha ai.

“Nuk bëhet më fjalë vetëm për vendet ku ne po kërkonim probleme të mundshme”, - tha ai, duke argumentuar se Franca është bërë më e dhunshme.

MBRETËRIA E BELGJIKËS ËSHTË PORTA E RE E DROGËS NË EVROPË.

Në të njëjtën kohë, në Belgjikën fqinje, hashashi i prodhuar ligjërisht në Kanada po rrjedh në vend, duke ngritur shqetësime se vendi po shndërrohet gjithnjë e më shumë në një shtet droge.

Një hetim nga gazeta britanike “The Telegraph” zbuloi se fermat e kanabisit në Kanada - të cilat u legalizuan nën kryeministrin Xhastin Trydo (Justin Trudeau) - po furnizojnë kontrabandistët me marihuanë me fuqi të lartë, e cila transportohet përmes portit të Antverpit.

Në vitin 2025, autoritetet doganore sekuestruan 32 ton hashash në port, një rritje prej 500% krahasuar me vitin e kaluar.

Në gjashtë muajt e parë të vitit 2026, janë sekuestruar 10.8 ton hashash.

Operacioni i kontrabandës dyshohet se është organizuar nga rrjete kriminale me lidhje me Republikën Popullore të Kinës.

“Në portin e Antverpit, bandat po u paguajnë punonjësve të korruptuar të portit deri në 40 mijë paund për të devijuar kontejnerë 6 metroshë që transportonin drogë në pjesë të ndryshme të portit për të shmangur kontrollet doganore”, sipas zyrtarëve që folën për gazetën britanike “The Telegraph”.

Hashashi transportohet më pas në Holandë, Gjermani, Francë dhe Itali nëpërmjet rrugëve tokësore me mbikëqyrje të kufizuar.

Droga të tjera, si kokaina, hyjnë gjithashtu përmes portit të dytë më të madh të Evropës.

Sasia më e madhe vjen nga Kolumbia, por edhe nga Ekuadori, Panamaja, Paraguai dhe Brazili.

Antverpi është bërë një fushë beteje gjithnjë e më e rrezikshme midis organizatave kriminale, me banditë të armatosur me mitralozë dhe granata që shantazhojnë dhe frikësojnë zyrtarët publikë, duke u përpjekur të pengojnë autoritetet të gjurmojnë dërgesat e kokainës dhe kanabisit.

Situata është përkeqësuar aq shumë sa disa nëpunës publikë janë vënë nën mbrojtjen e policisë pasi janë monitoruar dhe janë nënshtruar përpjekjeve për ryshfet nga anëtarët e bandave.

MAFIA KËRCËNON DREJTËSINË.

Më herët këtë vit, gjykatësi i lartë belg Bart Viloks (Vilox) paralajmëroi se pa veprime të menjëhershme, qytetarët e pafajshëm - të cilët nuk kanë lidhje me botën e krimit - rrezikojnë të tërhiqen në dhunë.

Gjykata e tij botoi një letër të hapur nga një gjyqtar anonim tetorin e kaluar, i cili tha se grupet kriminale kishin pushtuar vendin, duke shtuar se ato ishin bërë një forcë paralele që sfidon jo vetëm policinë, por edhe gjyqësorin.

Prokurori i përgjithshëm i rajoneve të Antverpit dhe Limburgut, Guido Vermeiren, u pajtua me letrën, duke thënë se Belgjika është bërë një vend kërcënimesh dhe korrupsioni.

Gjykatësi i lartë Viloks (Vilox) Vilox përshkroi efektet shkatërruese të tregtisë së drogës në shoqërinë belge, madje edhe tek fëmijët deri në 13 vjeç të cilët janë korruptuar nga bandat për të vjedhur kokainë nga portet.

“Ne me të vërtetë kemi një problem dhe duhet të investojmë më shumë në staf dhe burime të tjera për ta adresuar atë”, tha ai në një intervistë me entin mediatik “The Guardian”.

Gjykatësi tha se ata që refuzojnë të bashkëpunojnë me bandat përballen me kërcënime dhe sulme, duke thënë se punonjësit e portit që hezitojnë kanë marrë letra, foto të fëmijëve të tyre dhe kanë përjetuar sulme në shtëpitë e tyre me pajisje shpërthyese të improvizuara.

DHUNË EKSTREME NË BOTËN E DROGËS.

Rastet e tmerrshme të dhunës së lidhur me drogën kanë prekur Belgjikën për vite me radhë.

Në tetor të vitit të kaluar, trupi i copëtuar i 25-vjeçarit Tajn (Tyne), i cili ishte zhdukur nga Alkmaar në shtator, u gjet në një shtëpi fshati në Belgjikë. Vdekja e tij thuhet se lidhej me një mosmarrëveshje për drogë.

Në vitin 2022, 46-vjeçari Jasin (Yassine) El M'Rabet u torturua për vdekje në Bruksel pasi dyshohet se kishte vjedhur kokainë nga punëdhënësit e tij.

Ai u gjet i shtrirë në anë të rrugës, pasi thuhet se ishte torturuar me hekur, një flakë me avull, amoniak dhe ishte rrahur barbarisht.

Në të njëjtin vit, media holandeze raportoi se një 17-vjeçari iu pre veshi, iu prenë tendinat në dorë dhe iu hoq një pjesë e gishtit të këmbës, sepse besohej se i kishte dhënë informacion një bande rivale në lidhje me një ngarkesë prej 300 kilogramësh kokainë në Flandrën Lindore.

Në një nga rastet më të tmerrshme, një vajzë 11-vjeçare u qëllua për vdekje në Antverp në vitin 2023, kur u gjend në mes të një shkëmbimi zjarri midis tregtarëve rivalë të drogës.

Fëmija, nga zona e Merksem-it, po hante me familjen e tij kur shtëpia e tyre u sulmua me armë zjarri.

Në vitin 2020, policia holandeze zbuloi një dhomë të improvizuar torturash, të njohur nga kriminelët si një dhomë trajtimi, gjatë një hetimi për trafik droge.

Objekti i papërshkueshëm nga zhurma, e cila përmbante një karrige dentare me rripa lidhëse, u gjet në një depo pranë Roterdamit.

Autoritetet zbuluan objektin pasi çmontuan rrjetin telefonik kriminal të koduar “EncroChat”.

Brenda kontejnerit u gjetën mjete të gatshme për përdorim si pinca, bisturi dhe pranga.

Gjashtë kontejnerë të tjerë u konfiguruan për të mbajtur viktimat, të veshur me letër alumini për të shmangur zbulimin nga kamerat termike.

MBRETËRIA E SPANJËS ËSHTË PORTË E RE PËR KOKAINËN.

“Në Mesdhe, Spanja tani ia ka kaluar Belgjikës dhe Holandës si porta kryesore e kokainës në Evropë”, - e thënë kjo sipas Agjencisë Evropiane të Drogave.

Ky ndryshim, sipas autoriteteve të sigurisë, po nxit nivele të papara dhune.

Për dekada të tëra, vendndodhja gjeografike e Spanjës - me vijën e saj të gjatë bregdetare të Atlantikut dhe lidhjet me Amerikën e Jugut - e bëri atë një pikë hyrjeje natyrore për ngarkesat e paligjshme.

Vendi është gjithashtu një korridor kyç për hashashin, për shkak të distancës prej vetëm 9 miljesh midis Marokut dhe portit të Algeciras.

“Costa del Crime” (Bregu i Krimit) famëkeqe, dikur një strehë për kriminelët britanikë, është bërë një fushë beteje midis bandave të pamëshirshme të drogës dhe autoriteteve spanjolle të presionuara.

Të shtënat, ndjekjet me shpejtësi të lartë dhe ndëshkimet e tmerrshme janë bërë jashtëzakonisht të zakonshme në bregdetin jugor.

Më herët këtë vit, policia spanjolle zbuloi një labirint të sofistikuar nëntokësor që përdorej për të transportuar ton kanabis nga Maroku në Evropë.

Tuneli sekret, i fshehur nën një depo industriale në Keuta, kishte pompa, izolim akustik, shina dhe pajisje të rënda transporti.

Vitin e kaluar, dy kriminelë skocezë u qëlluan për vdekje në një bar në Spanjën jugore, ndërsa disa ditë më vonë një reper suedez u vra jashtë një kafeneje para turistëve të tmerruar.

Në janar të të njëjtit vit, u sekuestrua një nëndetëse me një ngarkesë kokaine me vlerë rreth 520 milionë paund.

Autoritetet portugeze njoftuan se kishin zbuluar pothuajse 9 ton drogë rreth 265 milje larg Ishujve Azore.

Operacioni u përshkrua si sekuestrimi më i madh i kokainës në historinë e Portugalisë.

Nëndetësja vinte nga Amerika Latine dhe mbante tre kolumbianë dhe një venezuelian, të cilët u arrestuan.

Z. Dhimitër Driza (Dimitris Drizos)

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit