5 USHTARË IZRAELITË TË KËMBËSORISË U VRANË DHE 14 TË TJERË MBETËN TË PLAGOSUR NË GAZËN VERIORE | NJË BOMBË SHPËRTHEU NDËRSA PO KALONIN NË NJË RRUGË NË BEIT HANUN.

Gazë | “Pesë ushtarë u vranë dhe 14 të tjerë u plagosën dje nga një pajisje shpërthyese në Beit Hanun, në veri të Rripit të Gazës”.

Forcat Mbrojtëse Izraelite (IDF) e njoftuan këtë sot, duke cituar mediat në shtetin hebraik.

IDF-ja deri më tani ka publikuar të dhënat personale vetëm të dy prej viktimave, të dy 20 vjeç që shërbejnë në batalionin Netzah Jehuda (Yehuda) të brigadës Kfir: rreshterët Meir Shimon Amar dhe Moshe Nissim Freç (Frech).

“Emrat e ushtarëve të tjerë të vdekur do të publikohen më vonë”, tha IDF-ja.

Sipas një hetimi paraprak të IDF-së, ushtarët e këmbësorisë u goditën nga një bombë buzë rrugës pak pas orës 22:00 dje gjatë operacioneve tokësore në Beit Hanun.

Ushtarët po vepronin në këmbë dhe nuk ishin në një automjet. Gjatë përpjekjeve për të nxjerrë të plagosurit, forcat izraelite u qëlluan në zonë, sipas të njëjtit hetim.

Nga 14 të plagosurit, dy janë në gjendje të rëndë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit