USHTRIA AMERIKANE GJETI PILOTIN E DYTË TË RRËZUAR NË IRAN.

Uashington, Amerikë | Forcat speciale amerikane kanë gjetur pilotin e dytë të zhdukur në Iran pas rrëzimit të një avioni luftarak “F-15E” të premten.

Kështu raportoi enti mediatik amerikan “Axios” (i përfolur si i lidhur me Inteligjencën amerikane) duke cituar burime zyrtare amerikane.

Sipas burimeve, si piloti ashtu edhe oficeri i sistemeve të armëve ishin në gjendje të vendosnin komunikim nëpërmjet sistemeve të tyre të komunikimit menjëherë pas hedhjes nga avioni.

Një nga zyrtarët amerikanë tha se operacioni u krye nga një njësi e specializuar komando, e mbështetur nga një mbulim i gjerë ajror, dhe se të gjitha forcat e përfshira tani janë larguar nga territori iranian.

Piloti u shpëtua disa orë pasi avioni u rrëzua. U deshën mbi 24 orë para se anëtari i dytë i ekuipazhit të gjendej dhe të shpëtohej.

Forcat speciale amerikane u vendosën në terren në Iran si të premten ashtu edhe dje si pjesë e misionit të kërkim-shpëtimit.

“Dje, ushtari i zhdukur u gjet dhe filloi operacioni i shpëtimit. Në të njëjtën kohë, Garda Revolucionare e Iranit dërgoi forcat e veta në rajon në një përpjekje për të penguar shpëtimin”, raportoi enti mediatik “Axios”.

Sipas burimeve, avionët luftarakë të Forcave Ajrore të ShBA-ës kryen sulme kundër forcave iraniane për t’i penguar ato të arrinin në zonën e prekur.

Gjatë operacionit të shpëtimit të pilotit të premten, forcat iraniane goditën një helikopter “Blackhawk” që merrte pjesë në mision.

Anëtarët e ekuipazhit pësuan lëndime, por helikopteri ishte në gjendje të vazhdonte fluturimin e tij.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit