REPUBLIKA POPULLORE E KINËS BLLOKOI VIZITËN E PRESIDENTIT TË REPUBLIKËS SË KINËS (TAJVANIT) LAI ÇING (CHING)-te NË AFRIKË.

Taipei, Republika e Kinës | Zyra e Presidentit të Republikës së Kinës (Tajvan), Lai Çing (Ching)-te, njoftoi zyrtarisht sot, më 1 maj 2026, shtyrjen e pacaktuar të vizitës shtetërore të planifikuar në Esuatini, pas asaj që e cilësoi si një fushatë të paprecedentë presioni nga ana e Republikës Popullore të Kinës.

Sipas njoftimit zyrtar, tri shtete ishullore në Oqeanin Indian - Sejshellet, Mauritiusi dhe Madagaskari - tërhoqën në mënyrë të papritur lejet e fluturimit për avionin presidencial tajvanez, duke e bërë të pamundur kalimin tranzit drejt Afrikës Jugore.

Zëdhënësi i Presidencës tajvaneze deklaroi se ky veprim është pasojë e drejtpërdrejtë e presionit të fortë dhe detyrimit ekonomik që Pekini ka ushtruar mbi këto vende.

Ky bllokim diplomatik vjen në një kohë kur Kina ka rritur përpjekjet për të izoluar plotësisht Tajpein në skenën ndërkombëtare, veçanërisht në kontinentin afrikan ku Esuatini mbetet aleati i fundit që njeh zyrtarisht Republikën e Kinës.

Ministria e Punëve të Jashtme të Tajvanit e dënoi ashpër ndërhyrjen, duke e quajtur atë shkelje të normave diplomatike dhe të lirisë së lëvizjes ajrore.

“Pekini po përdor fuqinë e tij ekonomike për të diktuar itineraret e udhëheqësve të zgjedhur në mënyrë demokratike, por kjo nuk do ta lëkundë vullnetin tonë për të forcuar lidhjet me aleatët tanë globalë”, u tha në një deklaratë.

Ky incident pason një rritje të tensioneve në Ngushticën e Tajvanit dhe vjen vetëm pak ditë përpara samitit të pritshëm midis liderëve të Kinës dhe ShBA-ës, ku statusi i ishullit pritet të jetë pika kryesore e rendit të ditës.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit