REPUBLIKA E KINËS (TAJVAN) | INTELIGJENCA KËRKON BASHKËPUNËTORË NË REPUBLIKËN POPULLORE TË KINËS.

Taipei, Republika e Kinës (Tajvan) | Qeveria e Tajvanit lançoi një faqe interneti të dielën për të inkurajuar qytetarët e Republikës Popullore të Kinës të raportojnë informacione, duke thënë se po ofronte një kanal të sigurt për atë që thotë se është një numër në rritje njerëzish që janë të ngopur me sistemin dhe duan ndryshim.

Republika e Kinës (Tajvani) dhe Republika Popullore e Kinës kanë spiunuar prej kohësh njëra-tjetrën, dhe Tajvani në veçanti ka raportuar një numër në rritje të rasteve të spiunazhit pekinez.

Byroja e Sigurisë Kombëtare e Tajvanit tha në faqen e saj të internetit se në vitet e fundit, ekonomia e Kinës është përballur me vështirësi në rritje, ndërsa kontrolli politik ka mbetur i shtrënguar.

“Së bashku me një gamë në rritje të problemeve sociale dhe të lidhura me jetesën, këto kushte kanë nxitur pakënaqësi publike”, thuhet në një deklaratë.

Si rezultat, një numër në rritje individësh u janë drejtuar agjencive përkatëse në Tajvan, duke dëshiruar të ofrojnë lloje të ndryshme informacioni.

Zyra e Çështjeve të Tajvanit në Kinë nuk iu përgjigj menjëherë një kërkese për koment.

Uebsajti hapet me një video promovuese njëminutëshe që byroja tha se ishte gjeneruar nga inteligjenca artificiale, ku tregohet një nëpunës civil kinez duke qenë dëshmitar i kolegëve të tij që hetohen dhe shkarkohen nga postet e tyre.

“Shokët e vjetër po zhduken në mënyrë të pashpjegueshme një nga një”, thotë rrëfimtari (narrator).

Videoja përfundon me zyrtarin që blen një telefon celular dhe shkruan në të, duke thënë: Tani është koha për të ndryshuar.

Uebsajti është i bllokuar në Republikën Popullore të Kinës, megjithëse shumë qytetarë përdorin VPN për të hyrë në faqe të tjera të bllokuara si mediat sociale perëndimore dhe motorët e kërkimit.

Byroja u bëri thirrje shtetasve kinezë brenda ose jashtë vendit që të ofrojnë në mënyrë aktive informacion dhe të bëjnë ndryshime me guxim.

Thuhej se taktika e re po ndiqte shembullin e agjencive në vende të tilla si ShBA-ës, Britania dhe Izraeli.

Kanali u mundëson shtetasve kinezë të ofrojnë informacione të lidhura me inteligjencën për të zgjeruar burimet e larmishme të inteligjencës së byrosë.

Republika Popullore e Kinës ka provuar vetë taktika të ngjashme.

Në vitin 2024, ajo njoftoi një adresë email- i ku njerëzit mund të raportonin informacione rreth krimeve të kryera nga separatistët e Tajvanit.

Qeveria e Tajvanit hedh poshtë pretendimet e Pekinit për sovranitet, duke thënë se vetëm populli i ishullit mund të vendosë për të ardhmen e tij.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit