MODERNA NJOFTON SE GJER NË VITIN 2030 DO TË KETË SHPIKUR VAKSINAT KUNDËR KANCERIT DHE MIOKARDIT.

Vaksinat e para në botë kundër kancerit, sëmundjeve kardiovaskulare dhe sëmundjeve autoimune mund të vijnë në vitin 2030. Njoftimi i një revolucioni të ardhshëm në mjekësi që do të lejojë shpëtimin e miliona jetëve falë vaksinave të personalizuara ka ardhur nga kompania amerikane Moderna, sipas gazetës britanike "Rojtari" (Guardian). Përvoja e fituar me vaksinat kundër Covid, thekson Moderna, ka lejuar që studimet mbi vaksinat kundër kancerit të përshpejtojnë kërkimet, aq sa është arritur ekuivalenti i 15 viteve progres në vetëm 12-18 muaj. Çfarë dihet për vaksinën mRNA dhe për melanomën Sipas Dr. Paul Burton , shefit mjekësor të Moderna-s, kompania do të jetë në gjendje t'i ofrojë këto vaksina në vetëm pesë vjet. "Vaksinat që do të mbërrijnë - shpjegon Burton - do të jenë shumë efektive dhe do të shpëtojnë miliona jetë njerëzish. Besoj se do të jemi në gjendje t'i ofrojmë popullatës botërore vaksina të personalizuara kundër kancerit kundër shumë llojeve të ndryshme të tumoreve". Si do të funksionojnë? Vaksinat kundër kancerit do të funksionojnë kështu: Si hap i parë, një biopsi në qelizat e kancerit do të identifikojë mutacionet që nuk janë të pranishme në qelizat e shëndetshme. Më pas, një algoritëm do të identifikojë se cilat mutacione po shkaktojnë rritjen e tumorit dhe janë në gjendje të aktivizojnë sistemin imunitar. Më pas do të krijohet një molekulë e ARN-së së dërguar (mRNA) me udhëzime për prodhimin e antigjeneve që do të shkaktojnë një përgjigje imune. mRNA, pasi të injektohet, do të rezultojë në pjesë të proteinave identike me ato që gjenden në qelizat e kancerit. Qelizat imune i hasin ato dhe shkatërrojnë qelizat e kancerit që mbartin të njëjtat proteina.