MBRETËRIA E BELGJIKËS | EURODEPUTETJA TINEKE STRIK DENONCOI NË PARLAMENTIN EVROPIAN SE QEVERIA MBROJTI DHE MBRON ISH-ZV.KRYEMINISTREN BELINDA BALLUKU NGA PROKURORIA E POSAÇME.

Bruksel, Mbretëria e Belgjikës | Çështja “Balluku” u bë objekt debati në Parlament nga eurodeputetja holandeze, Tineke Strik.

Ajo ngriti shqetësimin për mbrojtjen politike që iu bë dhe që po i bëhet ish-zv.kryeministres Belinda Balluku, duke vlerësuar nga njëra anë pavarësinë e Prokurorisë së Posaçme (SPAK), por nga ana tjetër duke kritikuar ashpër Kuvendin e Republikës së Shqipërisë për mosmiratimin e kërkesës proceduriale penale për heqjen e imunitetit të saj parlamentar.

Tashmë, Prokuroria e Posaçme (SPAK) ka ashpërsuar akuzat penale ndaj ish-zv.kryeministres Belinda Balluku, duke e regjistruar zyrtarisht si subjket të dyshuar për korrupsion dhe pastrim parash, përveç akuzës penale për shkelje të barazisë në tendera.

Skandali i fundit lidhet me dy tendera abuzivë me vlerë mbi 1 milion € në kohën kur ajo drejtonte “Albcontrol”-in.

Sipas prokurorëve të posaçëm, këto tendera iu dhanë në shkelje të hapur një kompanie ndërtimi, nga e cila ish-zv.kryeministrja Belinda Balluku dyshohet se mori si ryshfet një vilë luksoze në Dhërmi, në rezidencën “White Rocks”, me vlerë 145 mijë €, pasuri e patundshme kjo që u sekuestrua me vendim gjyqësor të GjKKO-së.

Vilën me kate ajo nuk mund ta regjistronte në emër të saj dhe për të fshehur zotërimin e saj, dyshohet se ka përdorur ish-futbollistin Igli Tare dhe një vartëse të saj në “Albcontrol”, shefen e kabinetit, znj. Joana Bushi.

Dyshohet se z. Igli Tare është bërë pronar i rremë (fiktiv) i vilës në “White Rocks” përmes një kontrate noteriale të lidhur më 5 dhjetor të vitit 2018.

Më pas, vila ka kaluar si e dhënë me qira ndaj znj. Joana Bushi, ndërkohë që në përdorim de facto e ka pasur ish-zv.kryeministrja Belinda Balluku.

Z. Igli Tare u intervistua disa orë nga agjentët e Byrosë Kombëtare të Hetimit (BKH) fillimisht i vetëm, por më pas u thirr edhe avokati i tij, fakt që pohoi se edhe ai është i dyshuar për përfshirje në krim ordiner.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit