KRYEMINISTRJA ITALIANE XHORXHA (GIORGIA) MELONI MBAJTI FJALIM 19 MINUTA NË OKB KU THA SE PAQJA DHE DIPLOMACIA NUK FITOJNË MË DHE SE KA 56 KONFLIKTE TË VAZHDUESHME NË MBARË BOTËN.

Jorku i Ri, Amerikë | “Ne jetojmë në një periudhë historike të përshpejtuar dhe komplekse, plot mundësi, por edhe të mbushur me rreziqe, të pezulluara midis luftës dhe paqes.

Në botë ka 56 konflikte të vazhdueshme, numri më i lartë që nga Lufta e Dytë Botërore.

Një botë shumë e ndryshme nga ajo në të cilën lindi OKB-ja me qëllim ruajtjen e paqes.

A ia kemi dalë mbanë?

Përgjigja është në lajme dhe është e pamëshirshme. Paqja, dialogu dhe diplomacia nuk janë më në gjendje të bindin dhe të fitojnë”, tha kryeministrja e Republikës së Italisë Xhorxha (Giorgia) Meloni, duke folur në Asamblenë e Përgjithshme të OKB-së.

Në fjalën e saj, Kryeministrja Meloni citoi fjalët e të ndjerit Papa Françeskut për një luftë të tretë botërore të zhvilluar pjesë-pjesë, duke kujtuar konfliktet më alarmante në Ukrainë dhe Gaza.

“Rusia ka shkelur qëllimisht Nenin 2 të Kartës së OKB-së dhe ende sot nuk tregon gatishmëri për t'u ulur në tryezën e paqes, me efekte destabilizuese”, shtoi Kryeministrja Meloni, duke akuzuar Moskën se i ka shkaktuar një plagë të thellë të drejtës ndërkombëtare.

“Reagimi duhet të respektojë parimin e proporcionalitetit dhe Izraeli e ka tejkaluar atë kufi dhe në këtë kufi ka përfunduar duke shkelur normat humanitare, duke shkaktuar një masakër të civilëve.

Këtë zgjedhje Italia e ka përcaktuar si të papranueshme dhe do të çojë në votën tonë në favor të disa prej sanksioneve të propozuara nga Bashkimi Evropian kundër Izraelit.

Izraeli duhet t'i shpëtojë kurthit të kësaj lufte. Duhet ta bëjë këtë për historinë e popullit hebre, për demokracinë e tij, për të pafajshmit, për vlerat universale të botës së lirë, pjesë e së cilës është.

Dhe për t'i dhënë fund një lufte, nevojiten zgjidhje konkrete. Sepse paqja nuk ndërtohet vetëm me thirrje, ose me shpallje ideologjike të pranuara nga ata që nuk duan paqe. Paqja ndërtohet me durim, me guxim, me arsyeshmëri”, tha ajo.

Duke përfunduar fjalimin e saj 16-minutësh, Kryeministrja Meloni citoi gjithashtu Shën Françeskun, më italianin e shenjtorëve, dhe frazën e tij se betejat e vështira janë të rezervuara vetëm për ata me guxim shembullor.

“Unë besoj se ka ardhur koha për ta demonstruar atë guxim”, tha Kryeministrja Meloni.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit