KARDINALI PIETRO PAROLIN (SEKRETARI I SHTETIT I VATIKANIT) DHA INTERVISTË PËR “TG2 POST”: SITUATA NË GAZË ËSHTË E PAQËNDRUESHME; ATA PO SHKATËRROJNË DHE PO I LËNË NJERËZIT TË URITUR.

Vatikan | “Një luftë pa kufij”.

Ky është vlerësimi i asaj që po ndodh në Gaza nga Kardinali Pietro Parolin, Sekretari i Shtetit i Vatikanit, në një intervistë telefonike të mbrëmshme, të premten, më 18 korrik, për “Tg2 Post”, një program lajmesh i entit mediatik “Rai”.

Kardinali foli për kufij të tejkaluar dhe një zhvillim dramatik, duke kërkuar qartësi në lidhje me sulmin ushtarak të së enjtes së kaluar ndaj Kishës së Familjes së Shenjtë në Gaza, i cili, la tre të vdekur dhe dhjetë të plagosur, përfshirë famullitarin, At Gabriel Romanelli.

Lidhur me luftërat e shumta që po vazhdojnë, ai kujtoi se Selia e Shenjtë është gjithmonë e hapur për ndërmjetësim, por ndërmjetësimi, deklaroi ai, është i vlefshëm vetëm kur të dyja palët e pranojnë atë.

Më pas, ai u përqendrua në bisedën telefonike midis Papës dhe Kryeministrit Benjamin Netanjahu.

“Mendoj se ishte e përshtatshme; ishte e pashmangshme të mos i shpjegohej Papës, të mos informohej Papa drejtpërdrejt për atë që ndodhi, gjë që është me rëndësi të madhe.

Kështu që e gjej pozitive telefonatën, e gjej pozitive gatishmërinë e Kryeministrit izraelit për të folur drejtpërdrejt me Papa Leon.

Tani, besoj se ka tre gjëra që mund të priten, sipas mendimit tim, nga kjo telefonatë me Papa Leon ose pas kësaj telefonate.

Së pari, që rezultatet e vërteta të hetimit të premtuar të bëhen të njohura. Sepse interpretimi fillestar që u dha ishte ai i një gabimi, por u dhanë garanci se do të kishte një hetim për çështjen; pra, që ky hetim të kryhet me seriozitet të plotë dhe që rezultatet të dihen dhe të bëhen të njohura.

Dhe pastaj, pas kaq shumë fjalësh, më në fund të bëhen të qarta faktet. Shpresoj vërtet që ajo që tha Kryeministri të mund të realizohet sa më shpejt të jetë e mundur, sepse situata në Gaza është vërtet e paqëndrueshme.

Sigurisht që është një luftë pa kufij, nga ajo që kemi parë; si mund ta shkatërrosh dhe ta lësh të vdesë nga uria një popullsi si ajo e Gazës?

Shumë kufij janë tejkaluar tashmë. Nga ana tjetër, ne e kemi thënë këtë që nga fillimi si diplomat i Selisë së Shenjtë; çështja e famshme e proporcionalitetit.

Lidhur me këtë episod, nëse shkon siç e përshkruat, është një zhvillim dramatik.

E përsëris: le t'u japim kohën që u nevojitet për të na treguar saktësisht se çfarë ndodhi.

Nëse ishte vërtet një gabim, gjë që është legjitimisht e dyshimtë, apo nëse kishte një dëshirë për të sulmuar drejtpërdrejt një kishë të krishterë, duke ditur se sa shumë të krishterët janë një forcë moderuese brenda Lindjes së Mesme dhe gjithashtu në marrëdhëniet midis palestinezëve dhe hebrenjve.

Prandaj, do të kishte përsëri një dëshirë për të eliminuar çdo element që mund të ndihmonte në arritjen e të paktën një armëpushimi dhe më pas paqes.

Ne mbetemi të hapur; në fakt, po e ofrojmë; kjo është bërë tashmë në raste të ndryshme.

Përtej kësaj, unë e shoh vërtet të vështirë të ndërmerren hapa të mëtejshëm, edhe sepse nëse e përdorni fjalën ndërmjetësim në një kuptim teknik, ndërmjetësimi hyn në fuqi vetëm kur të dyja palët e pranojnë atë.

Duhet të ketë gatishmëri nga ana e të dy pretendentëve, të dyja palëve në konflikt, të dyja vendeve ose të dyja popullatave në konflikt për ta pranuar këtë ndërmjetësim nga Selia e Shenjtë.

Ne do të vazhdojmë të këmbëngulim siç kemi bërë gjithmonë pa humbur shpresën, por teknikisht është shumë e vështirë.

Nga ana tjetër, keni parë se sa shumë ndërmjetësime jashtë Vatikanit kanë dështuar deri më tani.

Duhet vullnet politik për t'i dhënë fund luftës, duke ditur se kostot e një lufte janë të tmerrshme për të gjithë në çdo kuptim”, tha sekretari Parolin.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit