DËNOHET ME BURGIM TË PËRJETSHËM AUREL HOXHALLARI | ORGANIZOI VRASJEN E DEVI KASMIT.

Është dënuar me burgim të përjetshëm z. Aurel Hoxhallari, pjesë e grupit që vrau z. Devi Kasmin. Z. Kasmi u ekzekutua në Tiranë, nga dy persona me motoçikletë, që qëlluan mbi 41-vjeçarin, pesë herë, në kokë dhe në trup. Porositës i kësaj vrasjeje rezultoi z. Hoxhallari. Kush është Aurel Hoxhallari?

Z. Aurel Hoxhallari, u dyshua si i përfshirë në organizimin e grupit që kreu vrasjen e z. Devi Kasmit. Ngjarje kjo e ndodhur në datën 29 janar 2018 në rrugën “Kongresi i Manastirit” në Tiranë. Për këtë ngjarje janë vënë nën akuzë në kuadër të grupit të strukturuar kriminal ish-speciali grek z. Efthimios Efthimiu, me statusin e ekzekutorit të z. Kasmi, z. Aurel Hoxhallari alias Altin Hoxhallari, z. Elton Habilaj, z. Marvin Dinellari, z. Elton Hoxhallari dhe z. Marjo Meshini. Z. Hoxhallari, është arrestuar edhe më 10 Janar të vitit 2015 së bashku me kushëririn e tij, z. Amarildo Hoxhallari, si porositës të dyshuar për atentatin ndaj z. Pajtim Serjani, ngjarje e ndodhur më 5 Janar 2015 në “Rrugën e Kavajës” në Tiranë. Më 1 Shkurt 2015, ish-Gjykata e Krimeve të Rënda i la ata të lirë për mungesë provash.