BULLGARIA IU KUNDËRPËRGJIGJ DEKLARATAVE TË PRESIDENTIT RUS VLADIMIR PUTIN SIPAS TË CILAVE BULLGARIA DHE RUMANIA JANË FAJTORE PËR FILLIMIN E LUFTËS NË UKRAINË.

Sofje, Bullgari | Bullgaria ka reaguar ashpër ndaj deklaratave të presidentit rus në një dokumentar të transmetuar në televizionin shtetëror rus “Russia-1”.

Në filmin propagandistik “Rusia. Kremlini. Putini. 25 Vjet”, presidenti Vladimir Putin thotë se Rumania dhe Bullgaria kontribuan në tensionin që çoi në luftën në Ukrainë duke strehuar baza amerikane në territorin e tyre.

“Përpjekjet e Federatës Ruse për t’ua kaluar përgjegjësinë për fillimin e luftës së paligjshme dhe të paprovokuar në Ukrainë vendeve të tjera, përfshirë Bullgarinë, janë plotësisht të papranueshme dhe përbëjnë një manipulim të rëndë të fakteve”, tha Ministria e Jashtme Bullgare në një deklaratë.

Ajo kujtoi se pranimi i vendit në NATO është një vendim sovran i bazuar në vullnetin e qytetarëve bullgarë dhe proceset legjitime demokratike.

“Ky vendim diktohet nga aspirata e Bullgarisë për siguri, stabilitet dhe paqe të qëndrueshme në një kontekst rajonal.

Forcimi i potencialit parandalues ​​të shteteve anëtare synon mbrojtjen e territorit aleat, nuk përbën kërcënim për asnjë vend tjetër dhe është në përputhje të plotë me të drejtën ndërkombëtare”, shkruan gjithashtu autoritetet në Sofje, duke deklaruar se Bullgaria mbetet e përkushtuar fuqimisht ndaj detyrimeve të saj aleate brenda NATO-s dhe ndaj parimeve të Bashkimit Evropian.

Ministria e Jashtme rumune reagoi gjithashtu shpejt ndaj deklaratave të presidentit rus Vladimir Putin.

Baza kryesore e përdorur për stërvitjen e ushtrisë së Bullgarisë dhe Shteteve të Bashkuara është Novo Selo.

Sipas një marrëveshjeje me Uashingtonin, atje nuk mund të jenë të pranishëm më shumë se 2500 civilë dhe ushtarakë amerikanë të uniformuar.

Ky numër as nuk është afruar me kalimin e viteve.

Nga ana tjetër, Rumania po ndërton një bazë gjigante - Mihail Kogalniceanu, e cila ndodhet jo shumë larg Bullgarisë dhe do të jetë më e madhe se baza Ramstein në Gjermani.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit