AZERBAJXHAN | POLICIA KONTROLLOI SHTËPINË E SUBJEKTIT KRYESOR POLITIK TË OPOZITËS ALI KARIMLI GJATË HETIMEVE PËR PËRPJEKJE PËR GRUSHT SHTETI.

Kryetari i Partisë së Frontit Popullor të Azerbajxhanit, Ali Karimli, dhe mbështetësit e tij në një tubim të paautorizuar për të kërkuar lirinë e tubimit në Baku, Azerbajxhan, më 19 tetor 2019.

Baku, Azerbajxhan | Policia në Azerbajxhan kreu një kontroll të shtunën në shtëpinë e z. Ali Karimli, udhëheqësit të një prej partive kryesore të opozitës në vend, në mes të një hetimi në zgjerim të një përpjekjeje të dyshuar për grusht shteti për të rrëzuar Presidentin Ilham Aliev (Aliyev).

Një burim nga qeveria e Azerbajxhanit i tha agjencisë kanadeze të lajmeve Rojtërs (Reuters) se masa ndaj z. Karimli, i cili, ka udhëhequr Partinë e Frontit Popullor të Azerbajxhanit (APFP) që nga viti 2000, lidhej me një çështje penale në vazhdim kundër z. Ramiz Mehdiev (Mehdiyev), një aleat i hershëm i ish-Presidentit Heidar Aliev (Heydar Aliyev), i cili, udhëhoqi Azerbajxhanin deri pak para vdekjes së tij në vitin 2003.

“Dy anëtarë të APFP-së, z. Faik (Faiq) Amirli dhe z. Mammad Ibrahim, u arrestuan të shtunën”.

Kështu tha për agjencinë kanadeze të lajmeve Rojtërs (Reuters) zëvendësi i z. Karimli, Seimur (Seymour) Hazi.

Agjencia Rojtërs (Reuters) nuk mundi të kontaktonte avokatët e tyre.

Shërbimi i Sigurisë Shtetërore të Azerbajxhanit nuk ka komentuar mbi veprimet proceduriale penale.

Burimi qeveritar tha se autoritetet besonin se z. Karimli po financohej nga z. Mehdiev, i cili, iu bashkua qeverisë së z. Heidar Aliev (Heydar Aliyev) si kreu i administratës presidenciale gjatë viteve të para të mandatit të saj në vitin 1994.

Z. Ilham Aliev (Aliyev), djali i z. Heidar (Heydar), e shkarkoi z. Mehdiev në vitin 2019, në atë që në atë kohë u konsiderua si një veprim që synonte të detyronte largimin e zyrtarëve të emëruar gjatë mandatit të babait të tij.

Muajin e kaluar një gjykatë në Baku e la z. Mehdiev, me moshë 87 vjeç, në katër muaj arrest shtëpiak pasi e akuzoi për krime, përfshirë përpjekje për të marrë pushtetin.

Z. Karimli, udhëheqësi i APFP-së, është arrestuar disa herë në lidhje me organizimin e protestave në Azerbajxhan, një komb i pasur me naftë dhe gaz, i cili, është kritikuar nga qeveritë perëndimore për të drejtat e njeriut.

Shënim: Çdo subjekt i përmendur në përmbajtjen e këtij artikulli, mbështetur mbi parimin kombëtar procedurial penal dhe universal të prezumimit të pafajsisë, konsiderohet i pafajshëm penalisht, gjer në çastin kur ndaj tij, nga autoritetet kompetente shqiptare ose të huaja, do të jepet një vendim penal, i formës së prerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit