“ARD” DENONCON SE “AKP” KRYEN FUSHATË TË FSHEHTË ZGJEDHORE NË GJERMANI | BFV MBAN VESHËT PËRPJETË.

Gjermani | Partia për Drejtësi dhe Zhvillim (AKP) e presidentit turk Rexhep Taip Erdogan, po zhvillon një fushatë të fshehtë në Gjermani, përpara zgjedhjeve që do të mbahen në Turqi më 14 maj. Kështu raporton radiotelevizioni “Ard”, duke kujtuar se prej vitesh AKP kryen aktivitete propagandistike dhe influencuese mes turqve që banojnë në territorin gjerman. Operacione të tilla janë intensifikuar me afrimin e votimit të së dielës, me z. Erdogan në pushtet që nga viti 2014, kandidat për një mandat tjetër. Vetë AKP pranoi se kishte dërguar mijëra propagandistë në Evropë, kryesisht në Gjermani. "Pa u vënë re," këta përfaqësues të partisë së z. Erdogan kryen një fushatë masive elektorale, sipas z. Eren Guvercin, bashkëthemelues i Shoqërisë Alhambra, një shoqatë për myslimanët liberalë me qendër në Këln. Z. Guvercin ka dokumentuar aktivitetet e fushatës elektorale të AKP-së në Gjermani që nga viti 2022, dhe ka regjistruar të paktën 120 vizita të parlamentarëve dhe zyrtarëve të partisë në territorin gjerman. Megjithatë, këto hyrje nuk u regjistruan si ngjarje elektorale sepse, që nga viti 2017, daljet publike të zyrtarëve nga vendet joanëtare të BE-së i nënshtrohen autorizimit nga autoritetet gjermane. Tre muaj para zgjedhjeve, kësaj kategorie i ndalohet hyrja në Gjermani. Sipas z. Guvercin, këto rregulla janë anashkaluar me zgjuarsi. Deputetët e AKP-së, në fakt, kanë udhëtuar në Gjermani për të kaluar aktivitetet e tyre propagandistike elektorale si ngjarje kulturore, koncerte apo festa për agjërimin gjatë Ramazanit, muajit të shenjtë të Islamit. Në këto raste ka pasur ofendime dhe kërcënime ndaj kundërshtarëve, nga përfaqësues të AKP-së, si ai i deputetit Mustafa Acigoz, gjatë një mitingu që ka mbajtur janarin e kaluar, në xhaminë Neuss. Në një mënyrë më të fshehtë, Unioni i Demokratëve Ndërkombëtarë (UID), një shoqatë që pretendon se lufton islamofobinë dhe racizmin, ka kryer aktivitete propagandistike për z. Erdogan. Sipas Ministrisë së Brendshme të Rhein-Vestfalisë së Veriut, ajo është organizata më e rëndësishme e ndikimit e AKP-së. UID u themelua në vitin 2004, në Këln, nga z. Erdogan dhe AKP si Unioni i Demokratëve Europiano-Turkë (UETD). E riemërtuar UID në 2018, organizata është nën vëzhgim nga Zyra Federale për Mbrojtjen e Kushtetutës (Bfv), agjencia e brendshme e inteligjencës gjermane, e cila i klasifikon objektivat dhe metodat e saj të veprimit si të papajtueshme me Ligjin Bazë. Sipas shkencëtarit politik Burak Copur, UID shërben si një urë lidhëse strategjike midis votuesve të AK-së dhe institucioneve shtetërore të shtetit turk në Gjermani, siç janë konsullatat. Në një takim me zyrtarët e UID të mbajtur në Ankara në vitin 2022, z. Erdogan tregoi vlerën dhe funksionet e organizatës për fushatën elektorale që po përfundon. Në funksion të votimit, presidenti i Turqisë deklaroi në atë kohë, se detyra më e madhe i takon Unionit të Demokratëve Ndërkombëtarë, pra juve. Mos harroni: një popull, një flamur, një komb, një shtet! Së bashku me UID-në, edhe Unioni Turko-Islamik për Çështjet Fetare (DITIB), i themeluar në Këln në vitin 1984, kryen veprimtari propagandistike për AKP-në, në të cilin janë të lidhura rreth 900 xhami në Gjermani. Ditib i raporton drejtpërdrejt Drejtorisë së Çështjeve Fetare të Ankarasë (Diyanet), dhe më pas Presidentit të Turqisë. Në lidhje me këtë, z. Guvercin vuri në dukje se, në muajt para zgjedhjeve të 14 majit, shumë xhami në Gjermani u bënë pothuajse degë të AKP-së. Letrat e z. Erdogan iu shpërndanë besimtarëve myslimanë, dhe u organizuan transferta me autobus, nga vende të ndryshme kulti, drejt qendrave të votimit, të ngritura pranë konsullatave turke. Ndërkohë, 730000 banorë turq të Gjermanisë, rreth gjysma e totalit, votuan për zgjedhjet e 14 majit, 3 për qind më shumë se zgjedhjet e mëparshme në 2018. Qendrat e votimit janë mbyllur tani dhe numërimi i votave do të bëhet njëkohësisht me ato në Turqia.